ବାଲିଗୁଡ଼ା: କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଥାନା ଚାରି ଛକରେ ଫୁଟିଲା ଗୁଳି । ଦେଶୀ ବନ୍ଧୁକରୁ ଗୁଳି ଫୁଟି ଜଣେ ଗୁରୁତର । ଗୁରୁତର ଜଣକ ହେଲେ କୋଟଗଡ ଥାନା ରଡ଼ା ଗ୍ରାମର ଏଲିଅ ସୁନାମାଝୀ । ଆହତଙ୍କୁ ଗୁରୁତର ଅବସ୍ଥାରେ ଦାରିଙ୍ଗବାଡ଼ି ମେଡ଼ିକାଲରେ ଭର୍ତ୍ତି କରାଯାଇଥିଲା ବେଳେ ଅବସ୍ଥା ଗୁରୁତର ରହିବାରୁ ତାଙ୍କୁ ବ୍ରହ୍ମପୁର ଏମକେସିଜି ସ୍ଥାନାନ୍ତର କରାଯାଇଛି । ଘଟଣା ସ୍ଥଳରେ ପୋଲିସ ପହଞ୍ଚି ବନ୍ଧୁକ ଉଦ୍ଧାର କରି ଘଟଣାର ତଦନ୍ତ ଆରମ୍ଭ କରିଛି । ସୂଚନା ପ୍ରକାରେ କୋଟଗଡ ରଡ଼ା ଗ୍ରାମର ଏଲିଅ ସୁନାମାଝୀ ଦାରିଙ୍ଗବାଡ଼ି ଥାନା ପେତରବାଡି ଗ୍ରାମକୁ ଯାଇଥିଲେ । ଫେରିବା ବେଳେ ସାଥିରେ ଏକ ଗୁଳି ଭର୍ତ୍ତି ବନ୍ଧୁକଟିକୁ ଏକ ବସ୍ତା ଭିତରେ ଲୁଚାଇ ଦାରିଙ୍ଗବାଡ଼ି ଅଞ୍ଚଳକୁ ଆସୁଥିଲେ ତେବେ ଚାରିଛକ ଠାରେ ହଠାତ ବନ୍ଧୁକରୁ ଗୁଳି ଫୁଟିବା ଯୋଗୁଁ ଏଲିଅଙ୍କ ହାତ ପାପୁଲି ଛିଣ୍ଡିଯିବା ସହିତ ହାତରେ ଗଭୀର ଆଘାତ ଲାଗିଥିଲା । ହଠାତ ଗୁଳି ଶବ୍ଦ ଶୁଣି ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଥିଲା । ଦାରିଙ୍ଗବାଡ଼ି ଥାନା ଅଧିକାରୀ କୌଶିକ ମାଝୀ ଘଟଣା ସ୍ଥଳରେ ପହଞ୍ଚି ଦେଶୀ ବନ୍ଧୁକ ଜବତ କରି ନିଜ ଆଡୁ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛନ୍ତି । ଆହତ ବ୍ୟକ୍ତି ଜଣକ ଦେଶୀ ବନ୍ଧୁକ କାହିଁଁକି କେଉଁଠାରୁ ଏହି ବନ୍ଧୁକ ଧରି ଦାରିଙ୍ଗବାଡ଼ି ଆସିଥିଲେ କିମ୍ବା ସେ କୌଣସି ଚୋରା ଦେଶୀ ବନ୍ଧୁକ କାରବାରରେ ସାମିଲ ଅଛନ୍ତି କି ନାହିଁ, ବନ୍ଧୁକ ସେ କେଉଁଆଡେ ନେଉଥିଲେ ସେ ନେଇ ଭିନ୍ନ ଭିନ୍ନ ଦିଗ ପ୍ରତି ଦୃଷ୍ଟି ଦେଇ ତଦନ୍ତ ପରେ ଜଣାପଡ଼ିବ ବୋଲି ପୋଲିସ ପ୍ରଶାସନ ପକ୍ଷରୁ ସୂଚନା ମିଳିଛି । ଦାରିଙ୍ଗବାଡ଼ି ପୋଲିସ ଏହି ଘଟଣାକୁ ଅତି ଗୁରୁତର ଭାବେ ଗ୍ରହଣ କରିଛି ।