ବୌଦ୍ଧ : ମନମୁଣ୍ଡା ପୁଲିସକୁ ମିଳିଛି ବଡ଼ ସଫଳତା । ଏକ ଦେଶୀ ବନ୍ଧୁକ କାରଖାନାକୁ ଠାବ କରିବା ସହ ଏଭଳି ବେଆଇନ କାରବାରରେ ଲିପ୍ତ ଥିବା ଅପରାଧୀଙ୍କୁ ପୁଲିସ ଗିରଫ କରିଛି । ଘଟଣାସ୍ଥଳରୁ ପୁଲିସ ଏକାଧିକ ବନ୍ଧୁକ ଜବତ କରିଛି ।
ଗତରାତିରେ ପୁଲିସ୍ ଅତର୍କିତ ଚଢାଉ କରି ଏପରି କାରଖାନା ଠାବ କରିବା ସହ ବହୁ ବନ୍ଧୁକ ଜବତ କରିଛି । ଏଥିସହ ବନ୍ଧୁକ କାରିଗର ସିଲାଇପଡ଼ା ଗ୍ରାମର ଶେଷଦେବ ବିନ୍ଧାଣିକୁ ଗିରଫ କରାଯାଇଛି । ବୌଦ୍ଧ ଜିଲ୍ଲାର କଣ୍ଟାମାଳ ବ୍ଲକ୍ ଶଗଡା ଅନ୍ତର୍ଗତ ସିଲାଇପଡ଼ା ଗ୍ରାମରେ ଠାବ ହୋଇଛି ଏହି ଦେଶୀ ବନ୍ଧୁକ କାରଖାନା । ଏଥିସହ ଦେଶୀ ବନ୍ଧୁକ ଜବତ ହୋଇଥିବା ବେଳେ ଏହା ଦେଖି ଗ୍ରାମବାସୀଙ୍କ ମଧ୍ୟରେ ଛନକା ପଶି ଯାଇଛି ।
ବିଶ୍ୱସ୍ତ ସୂତ୍ରରୁ ଖବର ପାଇ, ଗତକାଲି ବିଳମ୍ବିତ ରାତିରେ ମନମୁଣ୍ଡା ପୁଲିସ୍ ସିଲାଇପଡ଼ା ଗ୍ରାମରେ ଚଢ଼ାଉ କରିଥିଲା । ଏହି ଚଢାଉ ସମୟରେ ଏକ ଘରୁ ଜଣେ ବନ୍ଧୁକ କାରିଗର ଶେଷଦେବ ବିନ୍ଧାଣିଙ୍କୁ ଗିରଫ କରାଯିବା ସହ ୨ଟି ପିସ୍ତଲ୍ ଏବଂ ୪ଟି ଦେଶୀ ବନ୍ଧୁକ ଜବତ ହୋଇଛି । ଚଢାଉ ସମୟରେ ବନ୍ଧୁକ ତିଆରି କରିବାରେ ବ୍ୟବହୃତ ବହୁ ସାମଗ୍ରୀ ମଧ୍ୟ ଜବତ ହୋଇଛି । ମୁଖ୍ୟତଃ କାଠ ଓ ଲୁହାକୁ ବ୍ୟବହାର କରି ଦେଶୀ ବନ୍ଧୁକ ତିଆରି କରାଯାଉଥିଲା । ହେଲେ ଏହି ବନ୍ଧୁକ ତିଆରି ପରେ କାହାକୁ ବିକ୍ରି ହେଉଥିଲା, କିଏ ଏହାପଛରେ ରହିଛ ସେ ସବୁ ଦିଗରେ ଏବେ ଖୋଲତାଡ଼ କରୁଛି ପୁଲିସ୍ । ତେଣୁ ଗିରଫଦାରୀ ସଂଖ୍ୟା ବଢିପାରେ ବୋଲି ଆଲୋଚନା ହେଉଛି ।