ଦଶପଲ୍ଲା : ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ୍ ବାଣୀଗୋଛା ଥାନା ଅନ୍ତର୍ଗତ ଜାମୁସାହି ତଇଲା ସାହି ଗ୍ରାମରେ ପାରିବାରିକ କଳହକୁ କେନ୍ଦ୍ରକରି ପତ୍ନୀଙ୍କୁ ପିଟି ହତ୍ୟା କରାଯାଇଥିବା ବାଣୀଗୋଛା ଥାନାରେ ଅଭିଯୋଗ ହୋଇଛି । ଅଭିଯୋଗକୁ ଆଧାର କରି ପୁଲିସ ସଂପୃକ୍ତ ବ୍ୟକ୍ତିଙ୍କୁ ଅଟକ ରଖି ଘଟଣାର ତଦନ୍ତ ଚଳାଇଛି । ପୁଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ତଇଲା ସାହି ଗ୍ରାମର ଯୋଗେନ୍ଦ୍ର ବେହେରାଙ୍କ ୨ଟି ପତ୍ନୀ ରହିଛନ୍ତି । ଯୋଗେନ୍ଦ୍ର ବିଭିନ୍ନ ସମୟରେ ପ୍ରଥମ ପତ୍ନୀ କୈକେୟୀଙ୍କୁ ମାରଧର କରି ଆସୁଥିଲେ । ଯାହାକୁ ନେଇ ବିଭିନ୍ନ ସମୟରେ ଥାନାରେ ଅଭିଯୋଗ ହେବା ସହ ଘଟଣାର ବହୁବାର ସମାଧାନ ହୋଇଛି । ହେଲେ ଗତ ୨୩ ତାରିଖ ଦିନ କୌଣସି କଥାକୁ ନେଇ ଯୋଗେନ୍ଦ୍ର ପତ୍ନୀ କୈକେୟୀଙ୍କୁ ପ୍ରବଳ ବାଡ଼ାପିଟା କରିଥିଲେ । କୈକେୟୀଙ୍କ ପରିବାର ଲୋକ ଖବର ପାଇ ପରଦିନ ଅର୍ଥାତ୍ ୨୪ ତାରିଖ ଦିନ ବାଣିଗୋଛା ଥାନାରେ ପହଞ୍ଚି ଅଭିଯୋଗ କରିଥିଲେ । ହେଲେ କୈକେୟୀଙ୍କ ଅବସ୍ଥା ଗୁରୁତର ଥିବାରୁ ବାପଘର କନ୍ଧମାଳ ଜିଲ୍ଲା ଖଜୁରୀପଡା ଅଂଚଳକୁ ଚିକିତ୍ସା ପାଇଁ ନେଇ ଯାଇଥିଲେ । ଗତକାଲି ଅବସ୍ଥା ଗୁରୁତର ହେବାରୁ ପରିବାର ଲୋକ ସ୍ୱାସ୍ଥ୍ୟକେନ୍ଦ୍ରକୁ ନେବା ବାଟରେ ତାଙ୍କର ମୃତ୍ୟୁ ହୋଇଥିଲା । ଖବର ପାଇ ଖଜୁରୀପଡ଼ା ପୁଲିସ ଶବ ଜବତ କରିବା ସହ ବ୍ୟବଚ୍ଛେଦ କରି ଏକ ଅପମୃତ୍ୟୁ ମାମଲା ରୁଜୁ କରିଛି । ଏପଟେ ପରିବାର ଲୋକଙ୍କ ଅଭିଯୋଗ ଆଧାରରେ ପୁଲିସ ଏହ ହତ୍ୟା ମାମଲା ରୁଜୁ କରିବା ସହ ସ୍ୱାମୀ ଯୋଗେନ୍ଦ୍ରଙ୍କୁ ଅଟକ ରଖି ପଚରାଉଚରା ଚଳାଇଥିବା ଥାନା ଅଧିକାରୀ ବୈଦ୍ୟନାରାୟଣ ଭୋଇ ସୂଚନା ଦେଇଛନ୍ତି ।