ନବରଙ୍ଗପୁର:- ମଙ୍ଗଳ ବିଭାଗର ଶିକ୍ଷା ଓ ଶିକ୍ଷା ନିରୀକ୍ଷକ ସଙ୍ଘ ପକ୍ଷରୁ ନବରଙ୍ଗପୁର ଜିଲ୍ଲା ମଙ୍ଗଳ ଅଧିକାରୀ ସ୍ମୃତି ରଞ୍ଜନ ସାମନ୍ତରାୟଙ୍କୁ ଅବସର କାଳୀନ ସମ୍ବର୍ଦ୍ଧନା ଦିଆଯାଇଛି । ଏହି ଅବସରରେ ଏକ ସଭାର ଆୟୋଜନ କରାଯାଇଥିଲା । ଉକ୍ତ ସଭାରେ ମୁଖ୍ୟ ଅତିଥି ଭାବରେ ଜିଲ୍ଲାପାଳ ଡ଼. କୋମଳ ଲୋଚନ ମିଶ୍ର ଯୋଗ ଦେଇ ସ୍ମୃତି ସାମନ୍ତରାୟଙ୍କ ଅବସରକାଳୀନ ଜୀବନର ସୁଖମୟ କାମନା କରିଥିଲେ । ଏହି ଅବସରରେ ପ୍ରକଳ୍ପ ପ୍ରଶାସକ ବେଣୁଧର ଶବର, ଅତିରିକ୍ତ ମଙ୍ଗଳ ଅଧିକାରୀ ସାଲୁ କୁମାର ଟୁଡୁ ମଞ୍ଚସିନ ଥିବା ବେଳେ ଶିକ୍ଷକ ମନୋଜ କୁମାର ପଟ୍ଟନାୟକ ମଞ୍ଚ ପରିଚାଳନା କରିଥିଲେ । ପ୍ରଧାନ ଶିକ୍ଷକ ହୃଷିକେଶ ମିଶ୍ର, ପ୍ରଶାନ୍ତ ଜେନା, ଗୋପାଳ ମିଶ୍ର, ସାଧୁରାମ ଭତ୍ରା, ରଞ୍ଜନ କୁମାର ବେହେରା, ଫ୍ରାନସିସ ନାଗ ପ୍ରମୁଖ ଶ୍ରୀ ସାମନ୍ତରାୟଙ୍କ ନବରଙ୍ଗପୁର ଜିଲ୍ଲାର ଶିକ୍ଷକ ଶିକ୍ଷୟିତ୍ରୀଙ୍କୁ ସାହାଯ୍ୟ ସହଯୋଗ କରିବା ସହ ବିଭିନ୍ନ ସମସ୍ୟାର ଆଶୁ ସମାଧାନ କରିଥିବା ଯୋଗୁଁ ଧନ୍ୟବାଦ ଜଣାଇଥିଲେ । ଜିଲ୍ଲା ମଙ୍ଗଳ ବିଭାଗର ବରିଷ୍ଠ କିରାଣୀ ଜିତେନ୍ଦ୍ର ଚୌଧୁରୀ ମଞ୍ଚ ଉପରେ ହିଁ ଜିଲ୍ଲାପାଳଙ୍କ ସ୍ୱାକ୍ଷର ସହ ଅବସରକାଳୀନ ପ୍ରୋଭିଜନାଲ ପେନସନ ପତ୍ର ଶ୍ରୀ ସାମନ୍ତରାୟଙ୍କୁ ପ୍ରଦାନ କରିବାରେ ସହଯୋଗ କରିଥିଲେ । ନିଜର ଅବସରକାଳୀନ ସମ୍ଭାଷଣରେ ଶ୍ରୀ ସାମନ୍ତରାୟ ନବରଙ୍ଗପୁରର ସମସ୍ତ ଶିକ୍ଷକ ଶିକ୍ଷୟିତ୍ରୀ, ଜିଲ୍ଲା କାର୍ଯ୍ୟାଳୟ କର୍ମକର୍ତ୍ତା, ଏଏନଏମ ଓ ମେଟ୍ରୋନ ମାନଙ୍କ ସହଯୋଗ ନିମନ୍ତେ ସାଧୁବାଦ ଜଣାଇଥିଲେ । ଜିଲ୍ଲାଶିକ୍ଷା ଓ ଶିକ୍ଷାନିରୀକ୍ଷକ ସଙ୍ଘ, ମଙ୍ଗଳ ବିଭାଗର ଜିଲ୍ଲା କାର୍ଯ୍ୟାଳୟ କର୍ମକର୍ତ୍ତା, ମେଟ୍ରୋନ ସଙ୍ଘ ଓ ଏଏନଏମ ସଙ୍ଘ ପ୍ରମୁଖ ବିଦାୟକାଳୀନ ସମର୍ଦ୍ଧନା ସହ ଉପହାର ପ୍ରଦାନ କରିଥିଲେ । ଏହି କାର୍ଯ୍ୟକ୍ରମରେ ସମସ୍ତ ଦଶଟି ବ୍ଲକ ରୁ ଶିକ୍ଷକ ଶିକ୍ଷୟିତ୍ରୀ, ମେଟ୍ରୋନ ଓ ଏନ ଏମ ଯୋଗ ଦେଇଥିଲେ ।