ସୁବର୍ଣ୍ଣପୁର: ସୁବର୍ଣ୍ଣପୁର ସଂସ୍କୃତି ଭବନ ଠାରେ ଜିଲ୍ଲା ପ୍ରଶାସନ ପକ୍ଷରୁ ବିଶ୍ୱ ଯୋଗ ଦିବସ ପାଳିତ ହୋଇଯାଇଛି । ସନ୍ଥ ଭୀମ ଭୋଇ ସେବା ଶ୍ରମ ଓ ଯୋଗ ମହୋତ୍ସବ ସମିତିର ମିଳିତ ସହଯୋଗରେ ଆୟୋଜିତ ଜ଼ିଲ୍ଲା ପ୍ରଶାସନର ଏହି ଅନ୍ତର୍ଜାତୀୟ ଯୋଗ ଦିବସ ପାଳନ ଅବସରରେ ସୁବର୍ଣ୍ଣପୁର ଜିଲ୍ଲାପାଳ ଅବୋଲୀ ସୁନୀଲ ନରୱଣେ ମୁଖ୍ୟ ଅତିଥି ଭାବରେ ଯୋଗ ଦେଇ ନିୟମିତ ଯୋଗାଭ୍ୟାସ ଓ ପ୍ରାଣାୟାମ ପ୍ରତ୍ୟେକଙ୍କ ଶାରୀରିକ ଓ ମାନସିକ ସ୍ତରରେ ସକାରାତ୍ମକ ପ୍ରଭାବ ପକାଇଥାଏ ବୋଲି କହିଛନ୍ତି । ଶିବିରରେ ଜିଲ୍ଲାପାଳ ନିଜେ ଯୋଗାଭ୍ୟାସ କରି ଆମେ ସମସ୍ତେ ଶରୀରକୁ ଫିଟନେସ ରଖିବା ସହିତ ଆମ ମନକୁ ପ୍ରଥମେ ସ୍ଥିର ରଖିବାକୁ ପଡିବ, ଆଉ ସେଥିପାଇଁ ଆମକୁ ନିୟମିତ ଭାବେ କିଛି ସମୟ ଯୋଗାଭ୍ୟାସ କରିବାକୁ ହେବ ବୋଲି ଉପସ୍ଥିତ ଛାତ୍ରଛାତ୍ରୀ, ସହରର ବୁଦ୍ଧିଜୀବୀ, ସରକାରୀ କର୍ମଚାରୀ ଓ ବିଭିନ୍ନ ଯୋଗ ସଂଗଠନ, ସ୍ୱେଚ୍ଛାସେବୀ ସଂଗଠନର କାର୍ଯ୍ୟକର୍ତ୍ତାଙ୍କୁ ଉଦବୋଧନ ଦେଇ କହିଥିଲେ । ସନ୍ଥ ଭୀମଭୋଇ ଟ୍ରଷ୍ଟ ଓ ଯୋଗ ମହୋତ୍ସବ ସମିତି ଏବଂ ଯୋଗାଳୟର ରଶ୍ମି ରଞ୍ଜନ ଦାଶ, ଜୟଦ୍ରଥ ଜଗଦଲା, ସଞ୍ଜୟ ମହାପାତ୍ର, ହରିହର ଶତପଥୀ, ମନୋଜ ପଣ୍ଡା, ନିରଞ୍ଜନ ତ୍ରିପାଠୀ, କାହ୍ନୁ ଚରଣ ସାହୁ ପ୍ରମୁଖଙ୍କ ସମେତ ସ୍ୱଚ୍ଛଭାରତ ସଂଗଠନ, ସରସ୍ୱତୀ ଶିଶୁ ବିଦ୍ୟା ମନ୍ଦିର, ପତଞ୍ଜଳି ଯୁବା ଭାରତ, ସୋନପୁର କଲେଜ ଏନସିସି ଲେଫ୍ଟନେଣ୍ଟ ଆଶିଷ ଆଗ୍ରୱାଲା ଓ କ୍ୟାଡେଟ ଏବଂ ଦୟାନନ୍ଦ ସ୍କୁଲ କର୍ମକର୍ତ୍ତା ସହଯୋଗ କରିଥିଲେ । ଆରଏସଏସର କର୍ମକର୍ତ୍ତାଙ୍କ ତତ୍ତ୍ୱାବଧାନରେ ସହରର ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀ ଏଥିରେ ସାମିଲ ହୋଇଥିଲେ । ଆରଏସଏସର ବିଭାଗ ବୌଦ୍ଧିକ ପ୍ରମୁଖ ତଥା ଯୋଗ ପ୍ରଶିକ୍ଷକ ଡକ୍ଟର ଦୀଲ୍ଲିପ ତ୍ରିପାଠୀଙ୍କ ଯୋଗମୁଦ୍ରାର ତାଳେ ତାଳେ ସଭିଏଁ ଯୋଗାସନ ଓ ପ୍ରାଣାୟାମ ପ୍ରଦର୍ଶନ କରିଥିଲେ । ତେବେ ଦିନକୁ ଦିନ ଯୋଗର ପରିସର ବ୍ୟାପକ ହେଉଥିବା ବେଳେ ଆଜି ସହରରେ ଶ୍ରୀ ଗୋପାଳଜୀ ଯୋଗାଳୟ, ଜିଲ୍ଲା ଫୌଜଦାରୀ ଓ ଦେୱାନୀ ଅଦାଲତ, ସୁବର୍ଣ୍ଣା ନାରୀ ଜାଗରଣ କେନ୍ଦ୍ର, ବାଲାଜୀ ମନ୍ଦିର ପରିସର ଓ ରାମଜୀ ମନ୍ଦିର ପରିସର ସମେତ ବିଭିନ୍ନ ବିଦ୍ୟାଳୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ୱାନ କ୍ରମେ ଯୋଗ ଦିବସକୁ ବେଶ ଉତ୍ସାହ ଓ ଉଦ୍ଦୀପନାର ସହିତ ପାଳନ କରାଯାଇଛି । ନିଜକୁ ସୁସ୍ଥ ରଖିବାକୁ ପ୍ରତ୍ୟହ ଯୋଗାସନ କରିବା ପାଇଁ ସୁବର୍ଣ୍ଣପୁର ପିଡିଡିଆରଡିଏ ନିହାର ରଞ୍ଜନ କଅଁର ଓ କ୍ରୀଡା ଅଧିକାରୀ ଅଭିଳାଷ ପୁରୋହିତ ପ୍ରମୁଖ ମଂଚାସୀନ ଅତିଥି ନିଜ ନିଜସ୍ୱ ମତ ରଖିଥିଲେ । କାର୍ଯ୍ୟକ୍ରମକୁ ଗ୍ରନ୍ଥାଗାରିକ ବିଦ୍ୟାପତି ପଣ୍ଡା ପରିଚାଳନା କରିଥିଲେ ।