କଟକ, ୨୯/୦୫ : କଟକରେ ଅଘଟଣ । ତାଳଦଣ୍ଡା କେନାଲକୁ କାର ଖସି ପଡ଼ିବାରୁ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ମୃତକ ଜଣକ ହେଲେ କନ୍ଦରପୁର ଅଞ୍ଚଳର ଜ୍ଞାନେନ୍ଦ୍ର ଜେନା । ଏହି ଦୁର୍ଘଟଣାରେ ତାଙ୍କ ପତ୍ନୀ ଅଞ୍ଜନା ଜେନା ଗୁରୁତର ଆହତ ହୋଇଛନ୍ତି । ଆହତ ମହିଳାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ତାଙ୍କ ସ୍ୱାମୀଙ୍କ ଶବ ବ୍ୟବଚ୍ଛେଦ ପାଇଁ ପଠାଯାଇଛି । ଏନେଇ ମଧୁପାଟଣା ପୁଲିସ ତଦନ୍ତ ଜାରି ରଖିଛି । ସୂଚନାନୁଯାୟୀ, ଜ୍ଞାନେନ୍ଦ୍ର ଜେନା ମାତୃଭବନ୍ ସ୍କୁଲ୍ ଠାରୁ ନୂଆବଜାର ଯାଇଥିବା ତାଳଦଣ୍ଡା କେନାଲ ରାସ୍ତାରେ ଦିନ ପ୍ରାୟ ସାଢେ଼ ଗୋଟାଏ ବେଳେ ଯାଉଥିଲେ । ରାସ୍ତା ଓ ଡ୍ରେନ କାମ ଚାଲି ଥିବାରୁ ସେଠାର ରାସ୍ତା ସଂକୀର୍ଣ୍ଣ ଥିଲା । ତେଣୁ କାର ସେହି ରାସ୍ତାରେ ଗଲା ବେଳେ ଭାରସାମ୍ୟ ହରାଇ କେନାଲ ଭିତରକୁ ଖସି ପଡିଲା । ପାଣି ଭିତରେ କାର ଲକ୍ ହୋଇଯିବାରୁ ଦୁହିଁଙ୍କୁ ଉଦ୍ଧାର କରିବା କଷ୍ଟକର ହୋଇଥିଲା । କାରକୁ ଓଲଟାଇ ସେମାନଙ୍କୁ ଉଦ୍ଧାର କରାଯାଇ ଏସସିବିରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଡାକ୍ତର ଜ୍ଞାନେନ୍ଦ୍ରଙ୍କୁ ମୃତ ଘୋଷଣା କରିଥିଲେ । ତାଙ୍କ ପତ୍ନୀ ଅଞ୍ଜନା ଜେନା ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ଏନେଇ ମଧୁପାଟଣା ପୁଲିସ ତଦନ୍ତ ଜାରି ରଖିଛି ।