ଦଶପଲ୍ଲା : ଗତକାଲି ରାତିରେ ଦଶପଲ୍ଲା ପୋଲିସ ଗଣିଆ ଦଶପଲ୍ଲା ରାସ୍ତାରେ ପେଟ୍ରୋଲିଙ୍ଗ କରୁଥିବା ବେଳେ ଗଞ୍ଜେଇ ଭର୍ତ୍ତି ଏକ କାରକୁ ଧରିବାରେ ସଫଳ ହୋଇଛି । ପୋଲିସ ସୂଚନା ଅନୁଯାୟୀ, ଦଶପଲ୍ଲା ପୋଲିସ ପକ୍ଷରୁ ପେଟ୍ରୋଲିଙ୍ଗ ବେଳେ ଯୋଗିବନ୍ଧ ନିକଟରେ ଏକ କାରକୁ ଦେଖି ପୋଲିସ ଯାଞ୍ଚ କରିଥିଲା । ଯାଞ୍ଚ ବେଳେ କାରରେ ଗଞ୍ଜେଇ ଥିବା ଜଣାପଡିବା ପରେ ପୋଲିସ କାର ସହ ସେଥିରେ ଥିବା ବ୍ୟକ୍ତିମାନଙ୍କୁ ଥାନାକୁ ଆଣିଥିଲା । କାର ଭିତରୁ ୨୪ କିଲୋ ୫୦୦ ଗ୍ରାମ ଗଞ୍ଜେଇ ବାହାରିବା ସହ ଏହି ଘଟଣାରେ ପୋଲିସ ଚାରି ଜଣକୁ ଗିରଫ କରିଛି । ଗିରଫ ବ୍ୟକ୍ତିମାନେ କନ୍ଧମାଳ ଜିଲ୍ଲା ସାନଗାଡୁ ଗ୍ରାମର ସୁଶୀଲ ଦିଗାଲ, ରଙ୍ଗାମାଟିଆ ଗ୍ରାମର ସଞ୍ଜିତ ଦିଗାଲ, କଟାଡି ଗ୍ରାମର ବିଳ୍ପବ ଦିଗାଲ, ଶୁକଦେବ ପ୍ରଧାନ ବୋଲି ଜଣାପଡିଛି । ଏ ସମସ୍ତ ଅଭିଯୁକ୍ତ କନ୍ଧମାଳ ଜିଲ୍ଲାର ହୋଇଥିବା ବେଳେ ଏମାନେ ଏକ ସାଣ୍ଟୋ କାର ଯୋଗେ ଗଞ୍ଜେଇ ଧରି ଯାଉଥିଲେ । ପୋଲିସ କାରକୁ ଜବତ କରିବା ସହିତ ସେମାନଙ୍କ ନିକଟରୁ ୫ଟି ମୋବାଇଲ ଫୋନ ଜବତ କରିଛି । ଗିରଫ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଥିବା ପୋଲିସ ପକ୍ଷରୁ ସୂଚନା ମିଳିଛି ।