ପୁରୀ : ରିଜର୍ଭ ପୋଲିସ ଲାଇନରେ ପାଳିତ ହୋଇଛି ୬୦ତମ ଗୃହରକ୍ଷୀ ପ୍ରତିଷ୍ଠା ଦିବସ । ଉତ୍ସବରେ ଆରକ୍ଷୀ ଅଧିକ୍ଷକ କେ ବିଶାଲ ସିଂ ମୁଖ୍ୟ ଅତିଥି ଭାବେ ଯୋଗଦେଇ ଗୃହରକ୍ଷୀ ମାନଙ୍କର କାର୍ଯ୍ୟର ଉଚ୍ଚ ପ୍ରଶଂସା କରିଥିଲେ । ସେ କହିଲେ ଯେ ବନ୍ୟା ବାତ୍ୟା ସମୟରେ ଗୃହରକ୍ଷୀ ମାନଙ୍କର କାର୍ଯ୍ୟ ପ୍ରଶଂସନୀୟ । କାର୍ଯ୍ୟ କ୍ଷେତ୍ରରେ ସେମାନେ ପୋଲିସକୁ ଉତ୍ତମ ସହଯୋଗ ଯୋଗାଇ ଦେଇ ଆସିଛନ୍ତି ।ଗୃହରକ୍ଷୀ ମାନେ ଉତ୍ତମ ସେବା କାର୍ଯ୍ୟକାରୀ ଜନ ସାଧାରଣଙ୍କର ଆସ୍ଥାଭାଜନ ହେବାକୁ ସେ ପରାମର୍ଶ ଦେଇଥିଲେ । ପ୍ଲାଟୁନ କମାଣ୍ଡର ପ୍ରଦୀପ ପଟ୍ଟନାୟକଙ୍କ ନେତୃତ୍ୱରେ ଚାରୋଟି ଦଳ ଚିତ୍ତାକର୍ଷକ ପ୍ୟାରେଡରେ ଅତିଥିଙ୍କୁ ଅଭିବାଦନ ଜଣାଇଥିଲେ । ଏହି ଅବସରରେ ଉଲ୍ଲେଖନୀୟ କାର୍ଯ୍ୟ ପାଇଁ ଦୀପକ ପ୍ରଧାନ, ଅନନ୍ତ ନାରାୟଣ ମହାପାତ୍ର, ପ୍ରକାଶ ଭୋଇ, ସନାତନ ବରାଳ ଏବଂ ବାବୁ ବେହେରାଙ୍କୁ ଏସପି ଶ୍ରୀ ସିଂ ସମ୍ବର୍ଦ୍ଧିତ କରିଥିଲେ । ଉତ୍ସବରେ ଅତିରିକ୍ତ ଏସପି ମିହିର ପଣ୍ଡା,ଆରଆଇ ଚନ୍ଦ୍ରଶେଖର ଦାସ,ଗୃହରକ୍ଷୀ ଆରଆଇ ଟୁନୁ ସାହୁଙ୍କ ସମେତ ବରିଷ୍ଠ ପୋଲିସ୍ ଅଧିକାରୀଗଣ ଉପସ୍ଥିତ ଥିଲେ ।