ପୁରୀ : ପୁରୀରେ ଆଜି ଏକ ଅଭାନୀୟ ଘଟଣା ଘଟିଛି । ଜଣେ ପୁଅର ଆକ୍ରମଣରେ ଜନ୍ମଦାତ୍ରୀ ମାଆର ଜୀବନ ଯାଇଛି । ସେହିପରି ଆକ୍ରମଣରେ ସାଇଭାଇ, ନିଜ ପତ୍ନୀ ଓ ବାପା ମଧ୍ୟ ଗୁରୁତର ଆହତ ହୋଇଥିବା ଜଣାପଡିଛି । ଏମିତି ଏକ ହୃଦୟ ବିଦାରକ ଘଟଣା ଘଟିଛି ମେରାଇନ ଥାନା ଅଞ୍ଚଳରେ । ମୃତକ ହେଉଛନ୍ତି ବାଲିଘାଟ ସୁଭଦ୍ରା ନଗରର ଗୁନିଲତା ଦୀକ୍ଷିତ । ଗୁରୁତର ଥିବା ପରିବାରର ତିନିଜଣ ବାପା, ସାନଭାଇ ଓ ଭାଉଜଙ୍କୁ ଚିକିତ୍ସା ପାଇଁ ପୁରୀ ସଦର ମୁଖ୍ୟ ଚିକିତ୍ସାଳୟ ରେ ଭର୍ତ୍ତି କରାଯାଇଛି । ଖବର ପାଇ ଘଟଣା ସ୍ଥଳରେ ମେରାଇନ ଥାନା ପୋଲିସ ସହ ଅତିରିକ୍ତ ଏସପି, ସଦର ଏସଡିପିଓ ତଦନ୍ତ କରୁଛନ୍ତି । ତେବେ ପାରିବାରିକ କଳହକୁ କେନ୍ଦ୍ର କରି ଏହି ଅଭାବନୀୟ ହତ୍ୟାକାଣ୍ଡ ଘଟିଥିବା ବେଳେ ଆକ୍ରମଣ କାରୀ ବଡ଼ପୁଅ ମଧ୍ୟ ମେଡିକାଲରେ ଚିକିତ୍ସାଧିନ ରହିଛି । ୪୦ଲକ୍ଷ ଟଙ୍କା କରଜ କରି ଏକ ଗାଡି ସର୍ଭିସିଂ ସେଣ୍ଟର କରିଥିଲେ ଦୁଇ ଭାଇ । କରଜ ଧୀରେ ଧୀରେ ବଢ଼ିବାରୁ ମାନସିକ ଭାରସାମ୍ୟ ହରାଇ ବସିଥିଲେ ବଡ଼ ପୁଅ ଜଣକ । ଆଜି ସକାଳୁ ମାଙ୍କ ସହ ଝଗଡା ଲାଗି ଥିବା ବେଳେ ଏକ ଧାରୁଆ ଅସ୍ତ୍ରରେ ମାକୁ ହତ୍ୟା କରିବା ସହ, ସାନ ଭାଇ, ନିଜ ପତ୍ନୀ ଓ ବାପାଙ୍କୁ ମଧ୍ୟ ଆକ୍ରମଣ କରି ଗୁରୁତର କରିଥିଲେ ବୋଲି ସୂଚନା ଦେଇଛି ସାନ ଭାଇ ସୁବ୍ରତ ଦୀକ୍ଷିତ । ତେବେ ଘଟଣାର ତଦନ୍ତ ଚାଲିଥିବା କହିଛନ୍ତି ସଦର ଏସଡିପିଓ ।