ଫୁଲବାଣୀ :କନ୍ଧମାଳ ଜିଲ୍ଲା ଫିରିଙ୍ଗିଆ ପଞ୍ଚାୟତ ସମିତିର ଉପାଧକ୍ଷ ଅଜିତ କୁମାର ସାହୁ ନିଖୋଜ ହୋଇଯାଇଥିବା ସୂଚନା ମିଳିଛି । ଶନିବାର ରାତି ପ୍ରାୟ ୯ ଟା ସମୟରେ ଫିରିଙ୍ଗିଆ ବ୍ଲକ ଜେଜେସ ପାଙ୍ଗା ଗାଁ ଠାରେ ଚାଲିଥିବା ଏକ ଯାତ୍ରାରେ ଅତିଥି ଭାବରେ ଯୋଗ ଦେବା ପାଇଁ ଯାଇଥିବା ସମୟରେ ରାସ୍ତାରୁ କୁଆଡେ ନିଖୋଜ ହୋଇଯାଇଥିବା ଜଣାପଡ଼ିଛି । ସୂଚନା ଅନୁସାରେ ଶୁକ୍ରବାର ଜେଜେଶପାଙ୍ଗା ଗାଁରେ ବରାଳ ଦେବୀ ପୂଜା ପାଇଁ ଯାତ୍ରା ଅନୁଷ୍ଠିତ ହୋଇଥିଲା । ଯାତ୍ରାରେ ଉପାଧ୍ୟକ୍ଷଙ୍କୁ ଅତିଥି ଭାବରେ ଡକାଯାଇଥିଲା । ଉପାଧ୍ୟକ୍ଷ ଜଣକ ନିଜ କାର ସହ ରତଙ୍ଗ ପଞ୍ଚାୟତର ସମିତି ସଭ୍ୟ ବିରଞ୍ଚି ମଲ୍ଲିକ ଓ ବସନ୍ତ ମାଝୀ ନାମକ ତାଙ୍କର ଜଣେ ସହଯୋଗୀଙ୍କ ସହ ଜେଜେଶପାଙ୍ଗା ଯିବା ପାଇଁ ବାହାରିଥିଲେ । କାର୍ଯ୍ୟକ୍ରମରେ ବିଳମ୍ବ ହେବାରୁ ସେ ତାଙ୍କ କାରରେ ସାଡୀଙ୍ଗିଆ ଯାଉଥିଲେ । ସାଡୀଙ୍ଗିଆ ଯିବା ରାସ୍ତାରେ ଥିବା ଘାଟି ନିକଟରେ କାରଟିକୁ ରଖି ପରିସ୍ରା କରିବା ପାଇଁ ଓହ୍ଲାଇ ଥିଲେ ଓ ପରିସ୍ରା କରିବା ପାଇଁ ଅଜିତ ଗୋଟେ ପଟେ ଯାଇଥିବା ବେଳେ ତାଙ୍କର ଦୁଇଜଣ ସହଯୋଗୀ ଅନ୍ୟପଟେ ପରିସ୍ରା କରିବା ପାଇଁ ଯାଇଥିଲେ । ଅଜିତଙ୍କ ଦୁଇ ସହଯୋଗୀ ପରିସ୍ରା କରି ଫେରିଲା ପରେ ଅଜିତ ପାଖରେ ନଥିବା ଦେଖିବାକୁ ପାଇଥିଲେ । ଅଜିତଙ୍କ ଦୁଇ ସହଯୋଗୀ ସ୍ଥାନୀୟ ଅଂଚଳରେ ବହୁ ଖୋଜା ଖୋଜି କଲା ପରେ ମଧ୍ୟ ଅଜିତଙ୍କୁ ପାଇ ନଥିଲେ ଓ ଅନ୍ୟପଟେ ଅଜିତଙ୍କ କାରରେ କାର ଚାବି ଲାଗି ରହିଥିବା ବେଳେ କାରରେ ତାଙ୍କ ମୋବାଇଲ ମଧ୍ୟ ରହିଛି ଓ ପରେ ତାଙ୍କର ସହଯୋଗୀ ଅର୍ଥାତ ରତଙ୍ଗ ସମିତି ସଭ୍ୟ ବିରଞ୍ଚି ମଳିକ ଫିରିଙ୍ଗିଆ ଥାନାକୁ ଫୋନ ଯୋଗେ ସବୁ କଥା ଜଣାଇ ଥିଲେ । ବର୍ତ୍ତମାନ ସୁଦ୍ଧା ଉପାଧ୍ୟକ୍ଷାଙ୍କ କୌଣସି ଖୋଜଖବର ମିଳିପାରି ନଥିବା ବେଳେ ପୋଲିସ ତଦନ୍ତ ଜାରିରଖିଛି । ଅନ୍ୟପଟେ ଉକ୍ତ ଅଞ୍ଚଳଟି ମାଓ ଅଧ୍ୟୁଷିତ ଅଂଚଳ ହୋଇଥିବାରୁ ମାଓବାଦୀମାନେ ଅଜିତଙ୍କୁ ଅପହରଣ କରିନେଇଥିବା ସନ୍ଦେହ କରାଯାଉଛି । କିଛିଦିନ ତଳେ ଏହି ଅଂଚଳରେ ମାଓବାଦୀମାନେ ଜଣେ ପୂର୍ବତନ ସରପଞ୍ଚଙ୍କୁ ଗୁଳି କରି ହତ୍ୟା କରି ନିଜର ସ୍ଥିତି ଜାହିର କରିଥିଲେ ଓ ତେବେ ଏହି ଘଟଣା ସାରା ଫିରିଙ୍ଗିଆ ଅଂଚଳରେ ଚର୍ଚ୍ଚାର ବିଷୟ ପାଲଟିଛି ।