ହରଭଙ୍ଗା :ଆଜି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ମହୁଲବୁରି ଓ କରଡ଼ି ଗ୍ରାମରେ ଅପରାହ୍ନ ପ୍ରାୟ ୨ଟା ସମୟରେ ହୋଇଥିଲା ଭୟଙ୍କର ଅଗ୍ନି କାଣ୍ଡ । ମିଳିଥିବା ସୂଚନା ଅନୁଯାଇ କୌଣସି ଏକ ବ୍ୟକ୍ତି ଗାଁ ପାଖରେ ଥିବା ଏକ ପଡିଆରେ ନିଆଁ ଲଗାଇ ଚାଲିଯାଇଥିଲା, ସେହି ନିଆଁ ଏକ ଭୟଙ୍କର ରୂପନେଇ ଏକର ଏକର ଜମିରେ ପଡ଼ିଥିବା ପାଳରେ ଲାଗିଯାଇଥିଲା । ଏହା ଦେଖିବା ମାତ୍ରକେ ଗାଁ ଲୋକ ସମସ୍ତେ ନିଆଁକୁ ଆୟତ୍ତ କରିବାକୁ ଚେଷ୍ଟା କରି ବିଫଳ ହେବାରୁ ବୌଦ୍ଧ ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଆସିଲା ବେଳକୁ ପ୍ରାୟ ୫ ଏକର ଜମି ଜଳି ପାଉଁଶ ହୋଇଯାଇଥିଲା । ସେଥିମଧ୍ୟରୁ ମହୁଲବୁରି କାର୍ତ୍ତିକ କୁମ୍ଭାରଙ୍କ ପ୍ରାୟ ଏକ ଏକରରେ ହୋଇଥିବା ଚଣା ଓ ଅନ୍ୟପଟେ କରଡ଼ି ଗ୍ରାମର ଦେବରାଜ ନନ୍ଦଙ୍କ ପ୍ରାୟ ୨୦ ଡେସିମିଲ ଜମିରେ ହୋଇଥିବା ମୁଗ ଗଛ ପୋଡି ନଷ୍ଟ ହୋଇଥିଲା । ଅଗ୍ନିଶମ ବାହିନୀର ମୁଖ୍ୟ ଜେ. କେ. ଦାସଙ୍କ ତତ୍ତ୍ୱାବଧାନରେ ତାଙ୍କ ସହକର୍ମୀ ଗୌରୀଶଙ୍କର, ନିରାକାର ବେହେରା, ଓ ଜୋଲିଶ କୁମାର ପ୍ରମୁଖ ନିଆଁକୁ ଆୟତ୍ତ କରିବାରେ ସଫଳ ହୋଇଥିଲେ ।