ସୁବର୍ଣ୍ଣପୁର: ସ୍କୁଲ ଛାତ୍ରଙ୍କ ଉପରେ ଗାଡି ମାଡି ଯିବାରୁ ୩ ଜଣଙ୍କ ମୃତ୍ୟୁ ହୋଇଥିବାବେଳେ ଅନ୍ୟଜଣେ ଛାତ୍ର ଆହତ ହୋଇଛି । ଆଜି ଦିନ ୧୧ ଟା ସମୟରେ ସୋନପୁର-ବିନିକା ରାସ୍ତାର ଶରଧାପାଲି ଛକରେ ଘଟିଥିଲା ଏହି ମର୍ମନ୍ତୁଦ ସଡକ ଦୁର୍ଘଟଣା । ଦୁର୍ଘଟଣାରେ ସରଧାପାଲି ସରକାରୀ ପ୍ରାଥମିକ ଉଚ୍ଚ ବିଦ୍ୟାଳୟର ଷଷ୍ଠ ଶ୍ରେଣୀର ଛାତ୍ର ସୁବ୍ରତ ଭୋଇଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିବାବେଳେ ଚିକିତ୍ସାଧିନ ଅବସ୍ଥାରେ ସୋନପୁର ଡାକ୍ତରଖାନାରେ ରାଜା ପେରାଙ୍କର ମୃତ୍ୟୁ ହୋଇଯାଇଥିଲା । ସେହିଭଳି ଅନ୍ୟ ଗୁରୁତର ଛାତ୍ର ରାଜେଶ ପେରାକୁ ବୁର୍ଲା ବଡ ମେଡିକାଲକୁ ଚିକିତ୍ସା ପାଇଁ ପଠାଯାଇଥିବାବେଳେ ରାସ୍ତାରେ ତାର ମଧ୍ୟ ମୃତ୍ୟୁ ହୋଇଯାଇଛି । ସେହିଭଳି ଅନ୍ୟ ଜଣେ ଆହତ ଛାତ୍ରକୁ ସୋନପୁର ମେଡିକାଲରେ ପ୍ରାଥମିକ ଚିକିତ୍ସା ପରେ ଘରକୁ ଛାଡି ଦିଆଯାଇଛି । ଉତ୍ତ୍ୟକ୍ତ ଲୋକଙ୍କ ଦ୍ୱାରା ସୋନପୁର-ବିନିକା ରାସ୍ତାର ଶରଧାପାଲି ଛକରେ ଅବରୋଧ କରାଯାଇଥିବାରୁ ରାସ୍ତାଦେଇ ଯିବା ଆସିବା ବନ୍ଦ ହୋଇଯାଇଛି । ଦୁର୍ଘଟଣା ଘଟାଇଥିବା ଡ୍ରାଇଭରକୁ ପୋଲିସ ଗିରଫ କରିବା ସହ ଘଟଣାସ୍ଥଳରେ ପରିସ୍ଥିତିକୁ ଦୃଷ୍ଟିରେ ରଖି ପୋଲିସ ମୁତୟନ ରହିଛି ।