ସୁବର୍ଣ୍ଣପୁର : ଓଡିଶା ସାମ୍ବାଦିକ ସଂଘ (ଓଜେୟୁ) ସୁବର୍ଣ୍ଣପୁର ଜିଲ୍ଲା ଶାଖା ତରଫରୁ ଆଜି ପୂର୍ବାହ୍ନ ସାଢେ ଦଶଟା ସମୟରେ ସ୍ଥାନୀୟ କେମିଷ୍ଟ ଏଣ୍ଡ ଡ୍ରଗିଷ୍ଟ ଆସୋସିଏସନର ସମ୍ମିଳନୀ ଗୃହଠାରେ ଏକ ସମ୍ବର୍ଦ୍ଧନା ସଭା କୋଭିଡ ଗାଇଡ଼ ଲାଇନ ଅନୁଯାୟୀ ଅନୁଷ୍ଠିତ ହୋଇଯାଇଛି । ସଭା ପ୍ରାରମ୍ଭରେ ସୁବର୍ଣ୍ଣପୁରର ଇଷ୍ଟ ଦେବୀ ମାଁ ସୁରେଶ୍ୱରୀଙ୍କ ଫଟୋ ଚିତ୍ରରେ ମାଲ୍ୟାର୍ପଣ ଓ ଦୀପ ପ୍ରଜ୍ଜଳନ ସହ ଓଡିଶା ସାମ୍ବାଦିକ ସଂଘର ପ୍ରତିଷ୍ଠାତା ତଥା ପ୍ରାକ୍ତନ ସଭାପତି ସ୍ୱର୍ଗତ ପ୍ରଭାତ ଦାସଙ୍କ ଫଟୋ ଚିତ୍ରରେ ମାଲ୍ୟାର୍ପଣ କରାଯାଇଥିଲା । ସୁବର୍ଣ୍ଣପୁର ଜିଲ୍ଲା ଶାଖା ସଭାପତି ମନୋରଞ୍ଜନ ତ୍ରିପାଠୀଙ୍କ ସଭାପତିତ୍ୱରେ ଅନୁଷ୍ଠିତ ଏହି ସମ୍ବର୍ଦ୍ଧନା ସଭାରେ ସଂଘର ଉପଦେଷ୍ଟା ଦିଲ୍ଲୀପ ପାତ୍ର ସ୍ୱାଗତ ଭାଷଣ ପ୍ରଦାନ କରି କରିଥିଲେ । ସୁବର୍ଣ୍ଣପୁର ଏସପି ସୀତାରାମ ଶତପଥି ମୁଖ୍ୟ ଅତିଥି, ସମ୍ମାନିତ ଅତିଥି ଭାବରେ ଓଡିଶା ସାମ୍ବାଦିକ ସଂଘର ରାଜ୍ୟ ସଭାପତି ଶଶୀଭୂଷଣ ପ୍ରହରାଜ, ରାଜ୍ୟ ଉପ ସଭାପତି ଶୁଶାନ୍ତ କୁମାର ମହାପାତ୍ର, ରାଜ୍ୟ ସମ୍ପାଦକ, ରାଜ କିଶୋର ତ୍ରିପାଠୀ, ମେଜର ସଞ୍ଜୟ ଷଡ଼ଙ୍ଗୀ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ସୁବର୍ଣ୍ଣପୁରର ବିଶିଷ୍ଟ ସମାଜସେବୀ ଲକ୍ଷ୍ମୀ ନାରାୟଣ ମେହେର ଓ ଶ୍ରୀବତ୍ସ ମଲ୍ଲିକ, ଜିଲ୍ଲା ସ୍ୱାସ୍ଥ୍ୟ ବିଭାଗର କୋଭିଡ ଯୋଦ୍ଧା ପ୍ରମୋଦ କୁମାର ସାହୁ, ଆନ୍ତର୍ଜାତୀୟ ତାଏକାଣ୍ଡୋ ଖେଳାଳୀ ଏହେଶାସ ହୋତା,୨୦୨୧ ମାଟ୍ରିକ ଟପ୍ପର ରିଷିକେଶ ପଣ୍ଡା ଓ ରାଜ୍ୟ ସଂଘର ନୂତନ କାର୍ଯ୍ୟକାରିଣୀ ସଦସ୍ୟ ନୀଳକମଲ ମିଶ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା । ସମାଜସେବୀ ଲକ୍ଷ୍ମୀ ନାରାୟଣ ମେହେର ଓ ଶ୍ରୀବତ୍ସ ମଲ୍ଲିକଙ୍କ ସହାୟତାରେ ସୁବର୍ଣ୍ଣପୁରର ବରିଷ୍ଠ ଓ ଦୁଃସ୍ଥ ସାମ୍ବାଦିକ ବିନୟ ରଂଜନ ପ୍ରଧାନ ଓ ସ୍ୱର୍ଗତ ଗୋପାଳ ମିଶ୍ରଙ୍କ ପତ୍ନୀଙ୍କୁ ପବିତ୍ରୀ ମିଶ୍ରଙ୍କୁ ଆଜିର ଏହି ଉତ୍ସବରେ ବାର୍ଷିକ ପେନସନ ପ୍ରଦାନ କରାଯାଇଥିଲା ପରେ ଜିଲ୍ଲା ସମ୍ପାଦକ ମହାଦେବ ମଲ୍ଲିକ ଧନ୍ୟବାଦ ଅର୍ପଣ କରିଥିଲେ ।