ଫୁଲବାଣୀ : କନ୍ଧମାଳ ଜିଲାରେ ଦିନକୁଦିନ ବେଆଇନ ଗଂଜେଇ ଚାଷ ଓ ଚୋରା ଚାଲାଣ ବଢିଚାଲିଥିବାରୁ ଏହାକୁ ରୋକିବା ପାଇଁ ଜିଲ୍ଲା ଅବକାରୀ ବିଭାଗ ସହଯୋଗରେ ଅଗ୍ରଣୀ କଳା ଓ ସଂସ୍କୃତି ଅନୁଷ୍ଠାନ ବନାନୀ କଳାସଙ୍ଗମ ପକ୍ଷରୁ ଫିରିଙ୍ଗିଆ ବ୍ଲକ ଅନ୍ତର୍ଗତ ପବିଙ୍ଗିଆ ପଂଚାୟତ କାର୍ଯ୍ୟାଳୟ ପରିସରରେ ଏକ ସଚେତନତା ସଭା ଅନୁଷ୍ଠିତ ହୋଇଥିଲା । ଅନୁଷ୍ଠାନର ସଂଯୋଜକ ତଥା ପ୍ରେସ କ୍ଲବ ସଭାପତି ସୁନୀଲ ପଟ୍ଟନାୟକଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ଫିରିଙ୍ଗିଆ ବ୍ଲକ ବିଡିଓ ରଶ୍ମିରଞ୍ଜନ ମହନ୍ତ ମୁଖ୍ୟ ଅତିଥିଭାବେ ଯୋଗ ଦେଇଥିବାବେଳେ ସରପଞ୍ଚ ଲାଲ ମୋହନ କହଁର, ସମିତି ସଭ୍ୟା ମାନସି କହଁର, ସମାଜସେବୀ ତଥା ବରିଷ୍ଠ ସାମ୍ବାଦିକ ନାରାୟଣ ସାହୁ, ଅବକାରୀ ବିଭାଗ ସବ ଇନ୍ସପେକ୍ଟର ସାଗର ଭୋଇ, ଅବକାରୀ ବିଭାଗ ବରିଷ୍ଠ ଅଧିକାରୀ ନାରାୟଣ ସାହୁ, ଆଇଟିଡ଼ିଏ ମିଶନ ଜୀବିକାର ଜି ବିକା ବିଶେଷଜ୍ଞ ବୈଦ୍ୟନାଥ ଖଟୁଆ, ପଂଚାୟତ ନିର୍ବାହୀ ଅଧିକାରୀ ତ୍ରିଲୋଚନ ଖମାରି, ଶିବରାମ ନାୟକ ପ୍ରମୁଖ ଯୋଗ ଦେଇ ବେଆଇନ ଗଂଜେଇ ଚାଷ ଓ କାରବାରରୁ ନିବୃତ୍ତ ହୋଇ ସରକାରଙ୍କ ବିଭିନ୍ନ ଜନ କଲ୍ୟାଣ ଯୋଜନା ର ସାମିଲହେବା ଲାଗି ପରାମର୍ଶ ଦେଇଥିଲେ । କମ ସମୟରେ କମ ପରିଶ୍ରମରେ ଅଧିକ ଉପାର୍ଜନ କରିବା ନିଶାରେ ଏହି ବେଆଇନ ଗଂଜେଇ ଚାଷକୁ ଆପଣାଉଛନ୍ତି ପରେ ପୋଲିସ ଓ ଅବକାରୀ ବିଭାଗ ଦ୍ୱାରା ଧରାପଡ଼ି ଜେଲକୁ ଯାଉଛନ୍ତି ଆଉ ସେମାନଙ୍କୁ ମୁକୁଳାଇବା ଲାଗି ପରିବାର ସର୍ବସ୍ୱାନ୍ତ ହେଉଛନ୍ତି । ଏଥିସହ ନିଜ ଗାଁ ଓ ଜିଲା ମଧ୍ୟ ବଦନାମ ହେଉଥିବା କହିଥିଲେ ।
ଏଣୁ ଏହି ଚାଷଠୁ ଦୂରେଇ ରହିବାକୁ ଶପଥ ନେବା ଲାଗି ପରାମର୍ଶ ଦେଇଥିଲେ ଅତିଥିମାନେ । ଏହା ପରେ ବରିଷ୍ଠ ଆଇନଜୀବୀ ତଥା ନାଟ୍ୟକାର ବିଜୟ ପଟ୍ଟନାୟକଙ୍କ ଦ୍ୱାରା ଲିଖିତ ଓ ନିର୍ଦ୍ଦେଶିତ ସଚେତନ ଧର୍ମୀ ପଥପ୍ରାନ୍ତ ନାଟକ’ ନୀଳ ଜହର’ ପ୍ରଦର୍ଶିତ ହୋଇଥିଲା । ସାମ୍ବାଦିକ ତଥା କଳାକାର ସଙ୍ଘ ଉପ ସଭାପତି ପ୍ରମୋଦ ଦଣ୍ଡସେନାଙ୍କ ନେତୃତ୍ୱରେ ନିଳ ଜହର ପ୍ରଦର୍ଶିତ ହୋଇଥିଲା । ପଂଚାୟତର ଲୋକ ପ୍ରତିନିଧିଙ୍କ ସମେତ ଏସଏଚଜି ମହିଳା, ଆଶା କର୍ମୀ ସ୍ୱେଚ୍ଛାସେବୀ, ସ୍ଥାନୀୟ ଜନସାଧାରଣ ବହୁସଂଖ୍ୟାରେ ଯୋଗ ଦେଇଥିଲେ ।