ବୌଦ୍ଧ,୯/୨- ଆଜି ସକାଳେ ହରଭଙ୍ଗା ଥାନା ଅର୍ନ୍ତଗତ ସୁରୁଣ୍ଡି ଗ୍ରାମରେ ଏକ ଦୁଃଖଦ ଘଟଣା ଘଟିଛି। ବାମ୍ଫିରେ ବୁଡି ଦୁଇ ଜଣ ଶିଶୁଙ୍କ ଅକାଳ ମୃତ୍ୟୁ ଘଟିଥିବା ଜଣା ପଡିଛି । ମିଳିଥିବା ସୂଚନା ଅନୁସାରେ ଆଜି ସକାଳେ ସୁରୁଣ୍ଡି ଗ୍ରାମର ପ୍ରଫୁଲ ବିଶିଙ୍କ ଏକ ମାତ୍ର ପୁଅ ସ୍ୱାଗତ ବିଶି(୮) ଏବଂ ସୁଦାମ ଦେହୁରୀଙ୍କ ସାନ ପୁଅ ପାର୍ଥ ଦେହୁରୀ(୮) ଦୁଇ ସାଙ୍ଗ ଗାଁ ପଛପାଖ ଦେଇ ଯାଇଥିବା କେନାଲ ପାଖକୁ ଶୌଚ ହେବାକୁ ଯାଇଥିଲେ। କେନାଲକୁ ଲାଗି ରହିଥିବା ଏକ ଫାର୍ମପଣ୍ଡ ବନ୍ଧ ମଧ୍ୟରେ ଏକ ବାମ୍ଫି ଖୋଳାଯାଇଛି। ଏହି ବାମ୍ଫିରେ ଦୁହେଁ ଅସାବଧାନତାବଶତଃ ଖସିପଡି ଥିବା ଅନୁମାନ କରାଯାଉଛି। ଫଳରେ ବାମ୍ଫିରେ ବୁଡି ଉଭୟ ଶିଶୁଙ୍କ ମୃତ୍ୟୁ ଘଟିଥିବା ଜଣାପଡିଛି। ଏ ଘଟଣା ପ୍ରଚାରିତ ହେବା ପରେ ପରିବାର ପରିଜନ ଓ ସ୍ଥାନୀୟ ଅଂଚଳରେ ଶୋକର ଛାୟା ଖେଳି ଯାଇଛି |