ଦଶପଲ୍ଲା : ବହୁ ଶିକ୍ଷିତ ବେକାର୍ ଯୁବକଯୁବତୀଙ୍କୁ ଚାକିରି କରାଇଦେବା ପ୍ରତିଶ୍ରୁତି ଦେଇ ଠକୁଥିବା ଅଭିଯୋଗରେ ରଣପୁର ପୋଲିସ ଜଣେ ଯୁବକକୁ ଗିରଫ କରିଛି । ତାଙ୍କ ଠାରୁ ଏକ କାର୍ ସହ ଦୁଇ ଲକ୍ଷ ଟଙ୍କା ଜବତ ହୋଇଛି । ସୂଚନା ଅନୁଯାୟୀ, ରଣପୁର ଥାନା ଅନ୍ତର୍ଗତ ହଂସରା ଗ୍ରାମର ରାଜୀବ ପ୍ରଧାନଙ୍କୁ ଆରଆଇ ଚାକିରି କରାଇ ଦେବା ନାଁରେ ଭଦ୍ରକ ଜିଲ୍ଲା ଧାନହର ବ୍ଲକ ଧୂଷୁରୀ ଥାନା ଅନ୍ତର୍ଗତ ନାୟିକାଣ୍ଡି ଗ୍ରାମର ମାନସ ସେନାପତି ଲକ୍ଷେ କୋଡିଏ ହଜାର ଟଙ୍କା ନେଇଥିଲେ ।
କିନ୍ତୁ କିଛି ଦିନ ପରେ ମାନସଙ୍କ କାର୍ଯ୍ୟକଳାପ ଦେଖି ସନ୍ଦେହ ସୃଷ୍ଟି ହେବାରୁ ରାଜୀବ ପ୍ରଧାନ ରଣପୁର ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ରଣପୁର ଥାନା ଏସଆଇ ପ୍ରୀତିପ୍ରକାଶ ମହାନ୍ତି ଓ ବିନାୟକ ପରିଡ଼ାଙ୍କ ନେତୃତ୍ୱରେ ଅଭିଯୁକ୍ତକୁ ଧରିବା ପାଇଁ ଏକ ଟିମ୍ ଗଠନ ହୋଇଥିଲା । ମାନସ ଅନ୍ୟ ଏକ ଠକାମୀ କରିବାକୁ ଆସିଥିବା ଖବର ପାଇ ରଣପୁର ପୋଲିସ ଅଭିଯୁକ୍ତକୁ ମଣିନାଗ ରାସ୍ତାରେ ଗିରଫ କରିଥିଲା । ଅଭିଯୁକ୍ତ ଜଣକ ନିଜକୁ ପୋଲିସ ଅଫିସର କହି ବେକାରୀ ଯୁବକ-ଯୁବତୀଙ୍କୁ ଠକୁଥିଲା ବୋଲି ଏସଆଇ ପ୍ରୀତିପ୍ରକାଶ ମହାନ୍ତି ସୂଚନା ଦେଇଛନ୍ତି ।