ହରଭଙ୍ଗା :ଅଯୋଧ୍ୟା ମର୍ଯ୍ୟାଦା ପୁରୁଷ ପ୍ରଭୁ ଶ୍ରୀରାମଲଲ୍ଲାଙ୍କ ପ୍ରାଣ ପ୍ରତିଷ୍ଠା ଉତ୍ସବ ଅବସରରେ ସାରା ଦେଶ ଭକ୍ତି ଭାବନାରେ ଉତ୍ସବ ମୁଖର ହୋଇପଡ଼ିଥିବା ବେଳେ ଆଜି ବୌଦ୍ଧ ଜିଲ୍ଲା ହରଭଙ୍ଗା ବ୍ଳକର ପୁରପଲ୍ଲୀ, ମଠ, ମନ୍ଦିର ଏପରିକି ଘରେ ଘରେ କୁମ୍ଭ କଲସି ସ୍ଥାପନ, ଦୀପ ପ୍ରଜ୍ଜଳନ, ନାମ ଯଜ୍ଞ, ଅନ୍ନ ଦାନ କରାଯାଇଥିବା ଦେଖିବାକୁ ମିଳିଛି । ସେହିପରି ବ୍ଲକର ପିତାମ୍ବରପୁର ଶ୍ରୀରାମ ମନ୍ଦିରରେ ନୀତିନିୟମ ଅନୁସାରେ ପୂଜାର୍ଚ୍ଚନା କରାଯାଇ ପ୍ରଭୁ ଅଯୋଧ୍ୟା ଠାରେ ଶ୍ରୀରାମଙ୍କର ପ୍ରାଣ ପ୍ରତିଷ୍ଠା ସିଧା ପ୍ରସାରଣ ଭକ୍ତ, ଶ୍ରଦ୍ଧାଳୁ ଦେଖିଥିଲେ । ଅନ୍ୟପଟେ ପୁରୁଣାକଟକ ହନୁମାନ ମନ୍ଦିରରୁ ହଜାରହଜାର ଶ୍ରଦ୍ଧାଳୁ ଜୟଶ୍ରୀରାମ ଧ୍ୱନିରେ ଏକ ଶୋଭାଯାତ୍ରା ଅନୁଷ୍ଠିତ ହୋଇଥିଲା ।
ସେହିପରି ଜିଲ୍ଲାର ୨୦୦ ବର୍ଷ ପୁରୁଣା ରାମ ମନ୍ଦିରରେ ଭକ୍ତି ଭାବ ସହ ପୂଜାର୍ଚ୍ଚନା ଦେଖିବାକୁ ମିଳିଥିବା ବେଳେ ବିଭିନ୍ନ ରାମ, ହନୁମାନ ମନ୍ଦିର ଗୁଡିକରେ ନାମ ସଂକୀର୍ତ୍ତନରେ ପରିବେଶ ଆନନ୍ଦମୟ ହୋଇ ଉଠିଥିବା ଦେଖିବାକୁ ମିଳିଛି । ଅନ୍ୟ ପଟେ ରାମଗଡ଼ ଜଗନ୍ନାଥ ମନ୍ଦିରଠାରେ ସରପଞ୍ଚ ପ୍ରଭାସିନୀ ଯୋଶୀଙ୍କ ଚେଷ୍ଟାରେ ଶହଶହ ଭକ୍ତ କୃଷ୍ଣଗୁରୁ ନାମଯଜ୍ଞ ସହିତ ଅନ୍ନ ଦାନ କରାଯାଇଥିବା ବେଳେ କରଡ଼ି ଗ୍ରାମର ଶିବଶକ୍ତି କ୍ଳବ ଜାଗର ଯାତ୍ରା କମିଟି ତରଫରୁ ଶ୍ରୀରାମ ମନ୍ଦିର, ଶିବ ମନ୍ଦିର ଓ ଗ୍ରାମର ସମସ୍ତଙ୍କ ଅଗଣାରେ ପୂର୍ଣ୍ଣ କୁମ୍ଭ,ଦୀପ ଜାଳି ବିଶାଳ ନାମ ସଂକୀର୍ତ୍ତନ ସହିତ ମହା ଆନନ୍ଦରେ ଶ୍ରୀରାମ ପ୍ରାଣ ପ୍ରତିଷ୍ଠା ଉତ୍ସବ ପାଳନ କରିଥିଲେ ।