୨୬ ଲକ୍ଷ ମୂଲ୍ୟର ବ୍ରାଉନସୁଗାର ଜବତ, ୮ ଗିରଫ

ପୁରୀ : ପୁରୀ ବାସେଳୀ ସାହି ଥାନା ଓ ସ୍ୱତନ୍ତ୍ର ସ୍କ୍ୱାର୍ଡକୁ ବଡ ସଫଳତା । ୨୬୭ଗ୍ରାମ ବ୍ରାଉନସୁଗାର ଜବତ କରାଯାଇଛି । ୩ ଜଣ ବ୍ରାଉନସୁଗାର ଯୋଗାଣକାରୀଙ୍କ ସହ ନୋଳିଆ ସାହିରେ କାରବାର କରୁଥିବା ୫ ମହିଳାଙ୍କୁ ଗିରଫ କରାଯାଉଛି । ସେମାନଙ୍କ ଠାରୁ ୨୬ ଲକ୍ଷ ମୂଲ୍ୟର ୨୬୭ ଗ୍ରାମ ବ୍ରାଉନସୁଗାର, ୩୫ ହଜାର ଟଙ୍କା, ୫ଟି ମୋବାଇଲ ଫୋନ୍‌ ଓ ଗୋଟିଏ ବାଇକ୍‌ ଜବତ ହୋଇଛି । ଗିରଫ ବ୍ରାଉନସୁଗାର ବେପାରୀ ମିଶ୍ର ନୋଳିଆ ସାହିର ସନ୍ତୁ ବେହେରା, କମଳ ବେହେରା ଓ ମିଟୁ ବେହେରା । ଛୋଟ ଛୋଟ ପୁଡିଆ କରି ବିକ୍ରି କରୁଥିବା ମିଶ୍ର ନୋଳିଆ ସାହିର ବବିତା ବେହେରା, ବିନି ନାୟକ, ନୀଳମଣି ନାୟକ, କନକ ବେହେରା ଓ ଗୀତା ବେହେରାଙ୍କୁ ଗିରଫ କରାଯାଇ ndps act 21(c) ଦଫାରେ କୋର୍ଟଚାଲାଣ କରାଯାଉଛି । ସହରକୁ ଧଳା ଜହର ମୁକ୍ତ କରିବା ପାଇଁ ଏସପି କେ.ବିଶାଲ ସିଂହଙ୍କ ନିର୍ଦ୍ଦେଶ କ୍ରମେ ସ୍ୱତନ୍ତ୍ର ସ୍କ୍ୱାର୍ଡ ଗଠନ କରାଯାଇଛି । ଗତ କିଛି ମାସ ଧରି ସହରରେ ବ୍ୟାପକ ବ୍ରାଉନସୁଗାର ଜବତ ସହ ଅନେକଙ୍କୁ ଗିରଫ କରାଯାଇଛି । ମୂଳ ବେପାରୀଙ୍କ ପାଖରେ ପହଞ୍ଚିବା ପାଇଁ ମଧ୍ୟ ପୁରୀ ପୋଲିସର ସ୍ୱତନ୍ତ୍ର ଡ୍ରାଇଭ୍‌ ଜାରୀ ରହିଛି । କିଛି ବ୍ରାଉନସୁଗାର ବେପାରୀ ଏହା ଆଣି ମହିଳାଙ୍କ ମାଧ୍ୟମରେ ବିକ୍ରୀ କରୁଥିବା ଖବର ପାଇଁ ପୋଲିସ ଚଢ଼ାଉ କରି ଏହି ଗ୍ୟାଙ୍ଗକୁ ଧରିବାରେ ସଫଳ ହୋଇଛି । ଆଜି ବାସେଳୀ ସାହି ଥାନା ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏ ସମ୍ପର୍କରେ ସୂଚନା ଦିଆଯାଇଛି ।