କଣ୍ଟାବାଞ୍ଜି : ଶଜନା ଗଛରୁ ଶାଗ ତୋଳିବା ବେଳେ ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ଜଣଙ୍କର ମୃତ୍ୟୁ ଘଟିଥିବା ଜଣାପଡିଛି । ଏଭଳି ଅଭାବନୀୟ ଘଟଣା ଆଜି ସକାଳୁ କଣ୍ଟାବାଞ୍ଜି ୧୪ ୱାର୍ଡରେ ଘଟିଛି । ଘଟଣାସ୍ଥଳରେ ଜିଆର୍ପି ପୋଲିସ ପହଞ୍ଚି ମୃତଦେହ ଜବତ କରିଛି ।
ଜିଆରପି ପୋଲିସ ପକ୍ଷରୁ ସୂଚନା ଅନୁସାରେ କଣ୍ଟାବାଞ୍ଜି ୧୪ ୱାର୍ଡ ସ୍ଥିତ ଆଶ୍ରମପଡାର ଜଣେ ବ୍ୟକ୍ତି ସାଗର ନାଗ(୫୫) ଆଜି ସକାଳୁ ମୁଖ୍ୟ ରାସ୍ତା କଡ଼ରେ ଥିବା ସଜନା ଗଛ ଉପରକୁ ଚଡି ଶଜନା ଶାଗ ତୋଳିବା ପାଇଁ ପ୍ରୟାସ କରିଥିଲେ । ସେହି ସମୟରେ ଶଜନା ଗଛକୁ ଲାଗି ୧୧କେଭି ବିଦ୍ୟୁତ ତାର ସଂସ୍ପର୍ଶ ଆସିଯାଇଥିଲେ । ସାଗର ବିଦ୍ୟୁତ ଝଟକା ଖାଇ ଘଟଣାସ୍ଥଳରେ ଟଳିପଡିଥିଲେ । ଖବର ପାଇ କଣ୍ଟାବାଞ୍ଜି ଜିଆର୍ପି ଫାଣ୍ଡି ଅଧିକାରୀ ଏସଆଇ ସୀତାରାମ ସୁନାରି, ଲଳିନ୍ଦ୍ର ଦଣ୍ଡସେନା ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଗୋଟିଏ ୟୁଡି କେଶ ନଂ ୨୪ ରୁଜୁ କରିବା ସହ ତଦନ୍ତ ଆରମ୍ଭ କରିଥିଲେ । କଣ୍ଟାବାଞ୍ଜି ଚିକିତ୍ସାଳୟରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କକୁ ମୃତଦେହ ହସ୍ତାନ୍ତର କରାଯାଇଥିଲା ।