ବୌଦ୍ଧ : ଆଜି ସକାଳ ପ୍ରାୟ ଘ ୭. ୩୦ ମିନିଟ ସମୟରେ ନିଜ ବିଲରେ ଟ୍ରାକ୍ଟର ଯୋଗେ ହଳ କରାଉଥିବା ସମୟରେ କାଶଲପୁର୍ ଗ୍ରାମର ଜଣେ ଚାଷୀ ହୃଦଘାତରେ ମୃତ୍ୟୁବରଣ କରିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ବୌଦ୍ଧ ଥାନା ତେଲିବନ୍ଧ ଗ୍ରାମ ପଂଚାୟତ କାଶଲପୁର୍ ଗ୍ରାମର ଚାଷୀ ସୁନିଲ ନାଏକ (୫୨ ବର୍ଷ ) ଟ୍ରାକ୍ଟର ଲଗାଇ ନିଜ ଚାଷ ଜମିରେ ହଳ କରାଉଥିଲେ । ଟ୍ରାକ୍ଟର ହଳ କରୁଥିବା ବେଳେ ବିଲ ମୁଣ୍ଡରେ ଠିଆ ହୋଇ ଦେଖୁଥିବା ସମୟରେ ହଠାତ୍ ପଡି ଯାଇଥିଲେ । ପାଖରେ ଥିବା ଅନ୍ୟ ମାନେ ତାଙ୍କୁ ତୁରନ୍ତ ବୌଦ୍ଧ ଡାକ୍ତରଖାନାକୁ ଆଣିବା ପାଇଁ ୧୦୮ ଆମ୍ବୁଲାନସକୁ ଫୋନ୍ କରିଥିଲେ । ଆମ୍ବୁଲାନସ ପହଞ୍ଚିବାରେ ଡେରି ହେବାରୁ ଗୋଟିଏ ଘରୋଇ ଗାଡି ଯୋଗାଡ କରି ଡାକ୍ତରଖାନା ଆଣିଥିଲେ । ଡାକ୍ତରଖାନା ପହଞ୍ଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଗ୍ରଣୀ ଚାଷୀ ସୁନିଲ ନାଏକଙ୍କ ଆକସ୍ମିକ ମୃତ୍ୟୁରେ ପରିବାର ଓ ବନ୍ଧୁ ବର୍ଗ ମଧ୍ୟରେ ଶୋକର ଛାୟା ଖେଳି ଯାଇଛି ।