ପାଟଣାଗଡ : ଯେଉଁ ବାପା କୋଳେଇ କାଖେଇ ବଡ କରିଥିଲା, ଶେଷରେ ତାଙ୍କୁ ତଣ୍ଟି ଚିପି ମାରି ଦେଲା ପୁଅ । ଏଭଳି ଏକ ଦୁଃଖଦ ଘଟଣା ଘଟିଛି ବଲାଙ୍ଗିର ଜିଲ୍ଲା ବେଲପଡା ଥାନା ଅନ୍ତର୍ଗତ ଘଗୁର୍ଲି ଗାଁରେ । ମୃତ ବ୍ୟକ୍ତି ଜଣଙ୍କ ହେଲେ ବୈକୁଣ୍ଠ ମାଝୀ । ଅଭିଯୁକ୍ତ ତଥା ବୈକୁଣ୍ଠଙ୍କ ପୁଅ ମହେଶ୍ୱର ମାଝୀକୁ ପୁଲିସ ଗିରଫ କରିଛି ।
ସୂଚନା ଅନୁଯାୟୀ, ବଲାଙ୍ଗୀର ଜିଲ୍ଲା ବେଲପଡା ଥାନା ଘାଗୁର୍ଲି ଗ୍ରାମର ବୈକୁଣ୍ଠ ମାଝୀ ଗତକାଲି ରାତି ଆଠଟାରେ ନିଜ ଘର ପିଢ଼ା ଉପରେ ବସିଥିଲେ । ତାଙ୍କର ମଝିଆ ପୁଅ ମହେଶ୍ୱର ମାଝୀ ରାତିରେ ମାତାଲ୍ ଅବସ୍ଥାରେ ଘରକୁ ଫେରିଥିଲେ । ତାଙ୍କ ପାରିବାରିକ କଥାକୁ ନେଇ ବାପା ପୁଅଙ୍କ ମଧ୍ୟରେ ବଚସା ହୋଇଥିଲା ଏଥିରେ ଅଭିଯୁକ୍ତ ମହେଶ୍ୱର ମାଝୀ ଉତ୍ତ୍ୟକ୍ତ ହୋଇ ତାଙ୍କ ବାପା ବୈକୁଣ୍ଠ ତଣ୍ଟି ଚିପି ଦେଇଥିଲେ । ପରିବାର ଲୋକ ତାଙ୍କୁ ତୁରନ୍ତ ଉଦ୍ଧାର କରି ବେଲପଡା ଡାକ୍ତରଖାନାକୁ ଆଣିଥିଲେ, କିନ୍ତୁ ସେଠାରେ ତାଙ୍କୁ ଡାକ୍ତର ମୃତ୍ୟୁ ଘୋଷଣା କରିଥିଲେ । ଘଟଣାର ଖବର ପାଇ ବେଲପଡା ଥାନା ଅଧିକାରୀ କୁଳୁମୁଣ୍ଡା ଓ ପାଟଣାଗଡ଼ ଏସ୍ ଡିପିଓ ଜ୍ୟୋତିର୍ମୟ ଭୁକ୍ତା ଘଟଣା ସ୍ଥଳରେ ପହଞ୍ଚି ଅଭିଯୁକ୍ତ ମହେଶ୍ୱର ମାଝୀଙ୍କୁ ଗରିଫ କରିବା ସହ ଏକ ହତ୍ୟା ମାମଲା ରୁଜୁ କରି ଘଟଣାର ଅଧିକ ତଦନ୍ତ କରୁଥିବା ଜଣାପଡିଛି ।