ସମ୍ବଲପୁର:ସମ୍ବଲପୁର ଓ ବୁର୍ଲାର ବିଭିନ୍ନ ସରକାରୀ ଓ ଘରୋଇ ହସ୍ପିଟାଲ ମାନଙ୍କରେ ଚିକିତ୍ସାଧୀନ ରୋଗୀଙ୍କ ପାଇଁ ନିରନ୍ତର ରକ୍ତର ଚାହିଦାକୁ ଦୃଷ୍ଟିରେ ରଖି ସମ୍ବଲପୁର ଜିଲ୍ଲା ପୁଲିସ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ଆଜି ସ୍ଥାନୀୟ ଅଇଁଠାପାଲି ଥାନାରେ ରକ୍ତଦାନ ଶିବିର ଅନୁଷ୍ଠିତ ହୋଇଥିଲା । ଏଥିରେ ଶ୍ରଦ୍ଧା ପୂର୍ବକ ଅନେକ ରକ୍ତଦାତାଙ୍କ ଯୋଗଦାନ କ୍ରମେ ୭୫ ୟୁନିଟ ରକ୍ତ ସଂଗ୍ରହ ହୋଇ ଯାଇଛି । ଏହି ରକ୍ତଦାନ ଶିବିରର ସଫଳ ରୂପାୟନ ପାଇଁ ସମ୍ବଲପୁର ଟ୍ରକ ମାଲିକ ସଂଗଠନ, ବୁଢାରଜା ଦୁର୍ଗାପୂଜା କମିଟି ଓ ବରେଇପାଲି ଗଣେଶ ପୂଜା କମିଟିଙ୍କ ସହିତ ପୁଲିସ କର୍ମଚାରୀଙ୍କ ବିଶେଷ ସହଯୋଗ ରହିଛି । ରକ୍ତଦାତାମାନେ ସ୍ବେଚ୍ଛାକୃତ ଭାବେ ଉତ୍ସାହର ସହିତ ଏଥିରେ ସାମିଲ ହୋଇ ରକ୍ତଦାନ କରିଥିଲେ । ସେମାନଙ୍କ ଏହି ସହଯୋଗ ପାଇଁ ଥାନା ପ୍ରଭାରୀ ଓ କର୍ମଚାରୀ କୃତଜ୍ଞତା ଜ୍ଞାପନ କରିଛନ୍ତି ।