ବାଲିଗୁଡ଼ା: ବେଆଇନ୍ ଗଞ୍ଜେଇ ଚୋରାଚାଲାଣ ବେଳେ କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ପୋଲିସ୍ ପକ୍ଷରୁ ଚଢ଼ାଉ । ୨୧କେଜି ୧୫୦ଗ୍ରାମ୍ ବେଆଇନ୍ ଗଞ୍ଜେଇ ସହ ଏକ ପଲସର ମୋଟରସାଇକେଲ ଜବତ କରିବା ସହ ଘଟଣାରେ ଦୁଇଜଣ ଚାଲାଣକାରୀଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ସୂଚନା ପ୍ରକାରେ ଆଜି ପୂର୍ବାହ୍ନରେ ଦାରିଙ୍ଗବାଡ଼ି ପୋଲିସ୍ ପକ୍ଷରୁ ପେଟ୍ରୋଲିଂ ଚାଲିଥିବା ସମୟରେ ଏକ କଳା ପଲସର ମୋଟର ସାଇକେଲ ନଂ-ଓଡି ୩୨ ଏଫ ୧୯୮୫ ରେ ଦୁଇଜଣ ଯୁବକ କିଛି ସାମଗ୍ରୀ ଧରି ଦ୍ରୁତଗତିରେ ଯାଉଥିବା ବେଳେ ଆମ୍ବଖାଲିଆ ଘାଟି ନିକଟରେ ଦାରିଙ୍ଗବାଡ଼ି ପୋଲିସ୍ ସେମାନଙ୍କୁ କାବୁ କରିବା ସହ ଯାଞ୍ଚ୍ କରିଥିଲା । ଯାଞ୍ଚ୍ ପରେ ସେମାନଙ୍କ ନିକଟରୁ ୨୧କେଜି ୧୫୦ଗ୍ରାମ୍ ବେଆଇନ୍ ଗଞ୍ଜେଇ ଜବତ କରିବା ସହ ଚାଲାଣରେ ବ୍ୟବହୃତ ପଲସର ମୋଟର ସାଇକେଲ ଜବତ କରିଛି ପୋଲିସ୍ । ଜବତ ଗଞ୍ଜେଇ ବାଲିଗୁଡା ଅଞ୍ଚଳରୁ ସୋରଡ଼ା ଅଞ୍ଚଳକୁ ଚୋରାଚାଲାଣ ହେଉଥିଲା ଏବଂ ଏହାର ଆନୁମାନିକ ମୂଲ୍ୟ ଏକ ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ ବୋଲି ସୂଚନା ମିଳିଛି । ଗିରଫ ଦୁଇ ଚାଲାଣକାରୀ ଗଞ୍ଜାମ ଜିଲ୍ଲା ସୋରଡ଼ା ଥାନା ଖାରିଗୁଡ଼ା ଅଞ୍ଚଳର ଜଗାମୋହନ ପ୍ରଧାନ ଏବଂ ସୋରଡ଼ା ଅଞ୍ଚଳର ପ୍ରବୀଣ କୁମାର ଗୌଡ଼ ହୋଇଥିବା ପୋଲିସ୍ ପକ୍ଷରୁ ସୂଚନା ମିଳିଛି । ସେପଟେ ଘଟଣାର ଅଧିକ ତଦନ୍ତ ଜାରି ରଖିଥିବା କହିଛନ୍ତି ଥାନା ଅଧିକାରୀ କୌଶିକ ମାଝୀ ।