ଦେବଗଡ଼ : ଦେବଗଡ ବନଖଣ୍ଡ ଅନ୍ତର୍ଗତ ବ୍ରାହ୍ମଣୀପାଲି ଗ୍ରାମରେ ଫରେଷ୍ଟ ସ୍ପେଶାଲ ସ୍କାଡ ପକ୍ଷରୁ ଚଢାଉ କରାଯାଇ ଏକ କଲରାପତରିଆ ବାଘଛାଲ ଜବତ କରାଯାଇଛି । ବ୍ରାହ୍ମଣୀପାଲି ଗ୍ରାମରେ ବାଘଛାଲ ବିକ୍ରି ନେଇ ମସୁଧା ଚାଲିଥିବା ସମ୍ପର୍କରେ ସ୍ପେଶାଲ ସ୍କାଡ ସୂଚନା ପାଇବା ପରେ ଦେବଗଡ ଡିଏଫଓଙ୍କ ନିର୍ଦ୍ଦେଶ ଅନୁଯାୟୀ ଏହି ଚଢାଉ କରାଯାଇଥିଲା । ବନବିଭାଗ ପକ୍ଷରୁ ଘଟଣାସ୍ଥଳରୁ କୁଣ୍ଢେଇଗୋଳା ଥାନା ଅନ୍ତର୍ଗତ କୁଶଖୁଳିଆ ଗ୍ରାମର ପଞ୍ଚାବନ ବର୍ଷ ବୟସ୍କ ପ୍ରହ୍ଲାଦ ପରିଡାଙ୍କୁ ଗିରଫ କରାଯାଇଥିଲା । ସେହିଭଳି ପ୍ରହ୍ଲାଦଙ୍କ ସୂଚନା ଆଧାରରେ ଏହି କଲରାପତରିଆ ବାଘ ମାରିଥିବା ଅଭିଯୋଗରେ ରିଆମାଳ ଥାନା ଅନ୍ତର୍ଗତ ସିମିଳିହତା ଗ୍ରାମର ପାଣ୍ଡବ ପ୍ରଧାନଙ୍କୁ ଗିରଫ କରାଯାଇଛି । ଜବତ ଛାଲଟି ଏକ ପ୍ରାପ୍ତ ବୟସ୍କ କଲରାପତରିଆ ବାଘଛାଲ ବୋଲି ଦେବଗଡ ରେଞ୍ଜ ଅଫିସର ଦେବଦତ୍ତ ନନ୍ଦ ସୂଚନା ଦେଇଛନ୍ତି ।