ବୌଦ୍ଧ : ବୌଦ୍ଧ ବ୍ଲକ୍ ଲକ୍ଷ୍ମୀପ୍ରସାଦ ଗ୍ରାମ ପଂଚାୟତର ଗୁଢୀଆଳି ଗ୍ରାମରେ ବୌଦ୍ଧ ପଂଚାୟତ ସମିତି ତରଫରୁ ପଶ୍ଚିମ ଓଡିଶା ବିକାଶ ପରିଷଦର ପାଞ୍ଚ ଲକ୍ଷ ଟଙ୍କାର ଅନୁଦାନରେ ଗୋଟିଏ ଗୋଷ୍ଠୀ କେନ୍ଦ୍ର ନିର୍ମାଣ କାର୍ଯ୍ୟ ଆରମ୍ଭ କରାଯାଇଥିଲା । ଆଜକୁ ପ୍ରାୟ ୩ ବର୍ଷ ତଳେ ଏହି ଗୋଷ୍ଠୀ କେନ୍ଦ୍ରର ନିର୍ମାଣ ଆରମ୍ଭ କରାଯାଇଥିଲେ ମଧ୍ୟ ଆଜି ଯାଏଁ ସମ୍ପୂର୍ଣ୍ଣ ହୋଇ ପାରୁନଥିବା ଅଭିଯୋଗ ହୁଏ । ଅର୍ଦ୍ଧ ନିର୍ମିତ ଗୋଷ୍ଠୀ କେନ୍ଦ୍ର ପରିତ୍ୟକ୍ତ ଅବସ୍ଥାରେ ପଡି ରହିଥିବାରୁ ତାହା ଗୋରୁ ଗାଈ ମାନଙ୍କ ଆବାସସ୍ଥଳୀରେ ପରିଣତ ହୋଇଥିବା ଦେଖିବାକୁ ମିଳୁଛି । ଗୋଷ୍ଠୀ କେନ୍ଦ୍ରର ପ୍ଲାଷ୍ଟର ଓ କବାଟ ଝରକା ଲଗାଗଲେ ଲୋକଙ୍କ ବ୍ୟବହାର ଉପଯୋଗୀ ହୋଇ ପାରନ୍ତା କିନ୍ତୁ କାମ କରୁଥିବା ଠିକାଦାର ସେ ଦିଗରେ କୌଣସି ପଦକ୍ଷେପ ନେଉନଥିବା ଯୋଗୁଁ ଗ୍ରାମବାସୀଙ୍କ ମନରେ ଅସନ୍ତୋଷ ପ୍ରକାଶ ପାଉଛି । ତୁରନ୍ତ କାର୍ଯ୍ୟ ସମ୍ପୂର୍ଣ୍ଣ କରାଯିବା ପାଇଁ ବୌଦ୍ଧ ବିଡିଓଙ୍କୁ ଗ୍ରାମବାସୀ ଅନୁରୋଧ କରିଛନ୍ତି ।