ବୌଦ୍ଧ,୨୦/୩ – ବୌଦ୍ଧ – ହରଭଙ୍ଗା ପୁରୁଣା ଜଗନ୍ନାଥ ସଡକର ସଦଲଗଣ୍ଡା ଘାଟୀ ନିକଟରେ କାର୍ ଧକ୍କାରେ ଦୁଇ ଜଣ ମୋପେଡ ଆରୋହୀ ଗୁରୁତର ଆହତ ହୋଇଥିବା ବେଳେ ଚାଳକ ସାମାନ୍ୟ ଆହତ ହୋଇଥିବା ଜଣାପଡିଛି l ମିଳିଥିବା ସୂଚନା ଅନୁଯାୟୀ ସଙ୍କୁଲେଇ ଗ୍ରାମ ପଞ୍ଚାୟତ ବୁଲୁରା ଗ୍ରାମର ସୁବାସ ଦୀପ (35) ତାଙ୍କର ପତ୍ନୀ ସୁଷମା ଦୀପ (30) ଓ ଜଣେ ସଂପର୍କୀୟ ବାଳିକା ଗୀତାଞ୍ଜଳି ବେହେରା (15) ଏକ ମୋପେଡ ଓଡ଼ି 27 ଏ 7928 ରେ ଜଗନ୍ନାଥ ସଡକରେ ଆସୁଥିଲେ l ଏ ସମୟରେ ହରଭଙ୍ଗା ଆଡକୁ ଆସୁଥିବା ଏକ କାର୍ ଓଡ଼ି 15 ଇ 5490 ସଦଲଗଣ୍ଡା ଘାଟୀ ନିକଟରେ ତାଙ୍କୁ ଧକ୍କା ଦେଇଥିଲା l ଫଳରେ ମୋପେଡ ଆରୋହୀ ମାନେ ଛିଟିକି ପଡିଥିଲେ l ମୋପେଡ ଚାଳକ ସାମାନ୍ୟ ଆହତ ହୋଇଥିବା ବେଳେ ସେଥିରେ ବସିଥିବା ଅନ୍ୟ ଦୁଇ ଜଣ ଗୁରୁତର ଆହତ ହୋଇଥିଲେ | ଦୁର୍ଘଟଣା ଘଟାଇଥିବା କାରରେ ସେମାନଙ୍କୁ ହରଭଙ୍ଗା ଡାକ୍ତରଖାନା ନେଇଥିଲେ | ସେମାନଙ୍କ ଅବସ୍ଥା ଗୁରୁତର ଥିବାରୁ ପରେ ବୌଦ୍ଧ ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ଜଣାପଡିଛି l କାରକୁ ଜବତ୍ କରି ହରଭଙ୍ଗା ପୋଲିସ୍ ତଦନ୍ତ କରୁଥିବା ସୁଚନା ମିଳିଛି l