ବାଲିଗୁଡ଼ା,୭/୩: ଗଞ୍ଜେଇ ଚୋରାଚାଲାଣ ବେଳେ ବାଲିଗୁଡ଼ା ପୋଲିସ୍ ପକ୍ଷରୁ ଅଚାନକ ଚଢ଼ାଉ । ବାଲିଗୁଡ଼ା ଥାନା ଜକିକିଆ-ମିଡ଼ିଆକିଆ ରାସ୍ତାରୁ ଗଞ୍ଜେଇ ଭର୍ତ୍ତି ଅଟୋ ସହ ସହଯୋଗୀ ସ୍କୁଟିକୁ ଜବତ କରିଛି ପୋଲିସ୍ । ଘଟଣାରେ ପୋଲିସ ଜଣକୁ ଗିରଫ କରିଥିବାବେଳେ ଅନ୍ୟ ଦୁଇଜଣ ସହଯୋଗୀ ପୋଲିସକୁ ଦେଖି ଜକିକିଆ ପୋଲ ନିକଟରେ ସ୍କୁଟି ଛାଡ଼ି ଫେରାର୍ ହୋଇଯାଇଥିବା ଜଣାପଡ଼ିଛି । ସୂଚନା ପ୍ରକାରେ ମିଡ଼ିଆକିଆ ଅଞ୍ଚଳରୁ ଗଞ୍ଜେଇ ଚୋରାଚାଲାଣ ହେଉଥିବା ବିଶ୍ବସ୍ତ ସୂତ୍ରରୁ ଖବର ପାଇ ଥିଲା ପୋଲିସ୍ । ଥାନା ଅଧିକାରୀ ପ୍ରଶାନ୍ତ କୁମାର ବେହେରାଙ୍କ ତତ୍ବାବଧାନରେ ଏକ ସ୍ବତନ୍ତ୍ର ଟିମ୍ ଗଠନ ହୋଇଥିଲା ଏବଂ ଏସ୍ଆଇ ଦିପକ ରାଉତଙ୍କ ଅଧ୍ୟକ୍ଷତାରେ ଟିମ୍ ମିଡ଼ିଆକିଆ ଅଞ୍ଚଳରେ ପହଁଚିଥିଲେ । ପୂର୍ବ ସୂଚନା ଅନୁଯାୟୀ ଜକିକିଆ- ମିଡ଼ିଆକିଆ ରାସ୍ତାରେ ଛକି ବସିଥିଲା ପୋଲିସ୍ । ଗଞ୍ଜେଇ ଭର୍ତ୍ତି ଏକ ଅଟୋ ଦୃତ ଗତିରେ ଆସୁଥିବା ବେଳେ ଅଚାନକ ଚଢ଼ାଉ କରିଥିଲା ପୋଲିସ୍। ଏବଂ ଗଞ୍ଜେଇ ଭର୍ତ୍ତି ଅଟୋକୁ ଜବତ କରିବାସହ ଜଣକୁ ଗିରଫ କରିବାରେ ସକ୍ଷମ ହୋଇଥିଲା ପୋଲିସ୍ । ଅଟୋରୁ ୪୨କେଜି ୩୦୦ଗ୍ରାମ୍ ଗଞ୍ଜେଇ ଜବତ ହୋଇଥିବା ବେଳେ ଜବତ ଗଞ୍ଜେଇର ଆନୁମାନିକ ମୂଲ୍ୟ ଦୁଇ ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ଏବଂ ଗିରଫ ଚାଲାଣକାରୀ ଜଣକ ବୋରିକିଆ ଗ୍ରାମର ଲାଜରା ଦିଗାଳ ହୋଇଥିବା ବୋଲି ପୋଲିସ ପକ୍ଷରୁ ସୂଚନା ମିଳିଛି । ସେପଟେ ଘଟଣାର ଅଧିକ ତଦନ୍ତ ଜାରି ରହିଥିବା କହିଛନ୍ତି ଥାନା ଅଧିକାରୀ ପ୍ରଶାନ୍ତ କୁମାର ବେହେରା ।