ସମ୍ବଲପୁର : ଏଠାରେ ବେଆଇନ ଭାବେ ପରିଚାଳିତ ନିଶା କାରବାର ଦିନକୁ ଦିନ ବଢି ଚାଲିଛି ଓ ଏଥିରେ ଲିପ୍ତ ଅପରାଧୀଙ୍କୁ ଧରିବାରେ ପୁଲିସ ନାକେଦମ ହୋଇଗଲାଣି । ଗତକାଲି ଏପରି ଏକ ରାକେଟର ପର୍ଦ୍ଦାଫାଶ କରିବାରେ ସ୍ଥାନୀୟ ଧନୁପାଲି ଥାନା ପୁଲିସକୁ ସଫଳତା ମିଳିଛି । ଏହି ଅଭିଯାନରେ ଦୁଇ ଜଣଙ୍କୁ ଗିରଫ କରାଯାଇଛି ଓ ସେମାନଙ୍କ ଠାରୁ ୫୩୦ ବୋତଲ କଫ ସିରପ, ୨୦ଟି ଖୋଲା ଠିପି ନିଶା ପାଇଁ ବ୍ୟବହୃତ କଫସିରପ, ୩୦ ନିଶା ବଟିକା, ଏକ ଲିଟର ଅପମିଶ୍ରିତ ନିଶା ସାମଗ୍ରୀ ଓ ଏକ ଟିଭିରେ ସ୍କୁଟି (ଓଡି୧୫ଏନ୩୩୫୦) ଜବତ କରାଯାଇଛି । ଏସବୁ ବେଆଇନ ନିଶାସାମଗ୍ରୀର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ବୋଲି କୁହାଯାଇଛି । ଏ ବିଷୟରେ ପୁଲିସ ମୁଖ୍ୟାଳୟ ସୂତ୍ରରୁ ପ୍ରାପ୍ତ ସୂଚନା ଅନୁସାରେ ଏକ ବିଶ୍ୱସ୍ତ ଖବର ପାଇ ସ୍ଥାନୀୟ ଡିଅରପାର୍କ ପାଖ ନିଛାଟିଆ ରାସ୍ତାରେ ସେମାନଙ୍କୁ ଠାବ କରି ପୁଲିସ ପକ୍ଷରୁ ସଦଳବଳ ଚଢ଼ାଉ କରାଯାଇ ସେମାନଙ୍କୁ ଧରା ଯାଇଥିଲା । ବର୍ତ୍ତମାନ ଶୀତଳଷଷ୍ଠୀ ଅବସର ରେ ନିଶାଖୋରଙ୍କ ପ୍ରାଦୁର୍ଭାବ ବଢ଼ି ଯାଇଛି ଓ ସେଥି ପାଇଁ ବେଆଇନ ନିଶା କାରବାରରେ ଲିପ୍ତ ଅପରାଧୀ ସକ୍ରିୟ ହୋଇ ପଡିଛନ୍ତି, ବୋଲି ପୁଲିସ ସୂତ୍ରରୁ ପ୍ରକାଶ ।