ଭୁବନେଶ୍ୱର: ବାଲେଶ୍ୱର ସଦର ଓ ତିର୍ତ୍ତୋଲ ଉପ ନିର୍ବାଚନ ପାଇଁ ଭାରତୀୟ ଜନତା ପାର୍ଟି ପକ୍ଷରୁ ଆଜି ପ୍ରାର୍ଥୀ ଘୋଷଣା କରାଯାଇଛି । ବାଲେଶ୍ୱର ସଦର ପାଇଁ ବିଜେପିର ସ୍ୱର୍ଗତ ବିଧାୟକ ମଦନ ମୋହନ ଦତ୍ତଙ୍କ ପୁତ୍ର ମାନସ କୁମାର ଦତ୍ତଙ୍କୁ ପ୍ରାର୍ଥୀ କରାଯାଇଥିବା ବେଳେ ତିର୍ତ୍ତୋଲ ଉପ ନିର୍ବାଚନ ପାଇଁ ରାଜକିଶୋର ବେହେରାଙ୍କୁ ପ୍ରାର୍ଥୀ କରାଯାଇଛି । ଏ ସଂପର୍କରେ ରାଷ୍ଟ୍ରୀୟ ମହାସଚିବ ଅରୁଣ ସିଂ ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ ଯେ, ମାନସ ଦତ୍ତ ସ୍ୱର୍ଗତ ମଦନ ମୋହନ ଦତ୍ତଙ୍କ ପୁଅ । ଅନୁକଂପା ଭୋଟ ଆଶାରେ ବିଜେପିରେ ଏଠାରେ ତାଙ୍କୁ ପ୍ରାର୍ଥୀ କରାଇଛି । ସେହିଭଳି କଂଗ୍ରେସକୁ ଛାଡି ବିଜେପିକୁ ଆସିଥିବା ରାଜକିଶୋର ବେହେରାଙ୍କୁ ତିର୍ତ୍ତୋଲ ବିଧାନସଭା ଆସନ ପାଇଁ ପ୍ରାର୍ଥୀ କରାଯାଇଛି । ଏହି ଦୁଇଟି ଆସନରେ ବିଜେପି ଦେଇଥିବା ପ୍ରାର୍ଥୀ ପ୍ରତିପକ୍ଷ ବିଜେଡି ଓ କଂଗ୍ରେସକୁ ନିର୍ବାଚନରେ ସମକକ୍ଷ ହୋଇପାରିବେ ବୋଲି ଦଳ ଆଶା ରଖିଛି । ପ୍ରକାଶଥାଉକି ବିଜେଡି ବିଧାୟକ ବିଷ୍ଣୁ ଦାସଙ୍କ ପରଲୋକ ପରେ ତିର୍ତ୍ତୋଲ ଆସନ ପାଇଁ ଉପ ନିର୍ବାଚନ ହେବାକୁ ଯାଉଥିବା ବେଳେ ବିଜେପି ବିଧାୟକ ମଦନ ଦତ୍ତଙ୍କ ଅକାଳ ବିୟୋଗ ପରେ ବାଲେଶ୍ୱର ସଦର ପାଇଁ ଉପନିର୍ବାଚନ ହେଉଛି । ଅନ୍ୟ ପକ୍ଷରେ ବିଜେଡି ଓ କଂଗ୍ରେସ ପକ୍ଷରୁ ଖୁବଶୀଘ୍ର ପ୍ରାର୍ଥୀଙ୍କ ନାମ ଘୋଷଣା କରାଯିବ ବୋଲି ସୂଚନା ଦିଆଯାଇଛି ।