ଭୁବନେଶ୍ୱର: ଗତକାଲି ଭାରତୀୟ ଜନତା ପାର୍ଟି ବାଲେଶ୍ୱର ସଦର ଓ ତିର୍ତ୍ତୋଲ ଉପ ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିଥିବା ବେଳେ ଆଜି ବିଜୁ ଜନତା ଦଳର ସଭାପତି ତଥା ମୁଖ୍ୟମନ୍ତ୍ରୀ ଉପ ନିର୍ବାଚନ ପାଇଁ ଦଳ ପକ୍ଷରୁ ପ୍ରାର୍ଥୀ ଘୋଷଣା କରିଛନ୍ତି । ବାଲେଶ୍ୱର ସଦର ପାଇଁ ଆଦୌ ଚର୍ଚ୍ଚାରେ ନଥିବା ସମସ୍ତଙ୍କୁ ଚକିତ କରି ସ୍ୱରୂପ ଦାସଙ୍କ ନାମ ଘୋଷଣା କରାଯାଇଥିବା ବେଳେ ତିର୍ତ୍ତୋଲ ପାଇଁ ଦିବଂଗତ ବିଜେଡି ନେତା, ପୂର୍ବତନ ମନ୍ତ୍ରୀ, ସାଂସଦ, ରାଜ୍ୟ ଯୋଜନା ବୋର୍ଡର ଉପାଧ୍ୟକ୍ଷ ବିଷ୍ଣୁ ଦାସଙ୍କ ସୁପୁତ୍ର ବିଜୟ ଶଙ୍କର ଦାସଙ୍କୁ ପ୍ରାର୍ଥୀ କରାଯାଇଛି । ଉଭୟ ନିର୍ବାଚନ ମଣ୍ଡଳରେ ନବୀନ ଦୁଇ ନୂଆଁ ମୁହଁଙ୍କୁ ସୁଯୋଗ ଦେଇଥିବା ବେଳେ ତିର୍ତ୍ତୋଲରେ ଅନୁକଂପା ଭୋଟ ହାତେଇବାକୁ ନବୀନ ପ୍ରୟାସ କରିଥିବା ବେଳେ ବାଲେଶ୍ୱର ସଦରରେ ନବୀନଙ୍କ ଭାବମୂର୍ତ୍ତି ହିଁ ଭୋଟରେ ରୂପାନ୍ତରିତ ହେବ । ଉପ ନିର୍ବାଚନ ପାଇଁ ତ୍ରିକୋଣୀୟ ପ୍ରତିଦ୍ୱନ୍ଦିତା ହେବା ସ୍ପଷ୍ଟ ହୋଇଥିବା ବେଳେ କଂଗ୍ରେସ ତା\’ର ପ୍ରାର୍ଥୀ ଏ ଯାଏଁ ଘୋଷଣା କରିନାହିଁ । ବିଶ୍ୱସ୍ତ ସୂତ୍ର ଅନୁଯାୟୀ କଂଗ୍ରେସ ଆସନ୍ତାକାଲି ତାହାର ପ୍ରାର୍ଥୀ ଘୋଷଣା କରିବ । ଉପ ନିର୍ବାଚନକୁ ନେଇ ତ୍ରିକୋଣୀୟ ପ୍ରତିଦ୍ୱନ୍ଦିତା ଉଭୟ ବିଧାନସଭା ଆସନରେ ରାଜନୈତିକ ମାହୋଲକୁ ସରଗରମ କରିବ ବୋଲି ଆଶା କରାଯାଉଛି ।