ବୌଦ୍ଧ / ବାଉଁଶୁଣି – ଆଜି ଅପରାହ୍ନ ପ୍ରାୟ ଘ.୧. ୩୦ ମିନିଟ ସମୟରେ ଗୁଦୁଗୁଦା ପାଟଳୀପଡା ଗ୍ରାମ୍ୟ ଉନ୍ନୟନ ବିଭାଗ ରାସ୍ତାର ବୁଢୀକଣ ଗ୍ରାମ ନିକଟରେ ଦୁଇଟି ବାଇକ ମଧ୍ୟରେ ମୁହାଁମୁହିଁ ଧକ୍କା ହେବାରୁ ତିନିଜଣ ଗୁରୁତର ଆହତ ହୋଇଛନ୍ତି । ମିଳିଥିବା ସୂଚନା ଅନୁଯାୟୀ ବୀରମହାରାଜପୁର ଉପଖଣ୍ଡ ଅନ୍ତର୍ଗତ ନାଏକ ପଡା (ବିଶିପଡା) ଗ୍ରାମର ବଳରାମ ମହାପାତ୍ର ଓ ଦୈତାରୀ ମହାରଣା ଏକ ବାଇକ ଯୋଗେ ପାଟଳୀପଡା ଗ୍ରାମକୁ ଯାଉଥିବା ବେଳେ ବିପରିତ ଦିଗରୁ ଆସୁଥିବା ପୁଡୁଗପଥର ଗ୍ରାମର ସତ୍ୟ ବାଘଙ୍କ ବାଇକ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଉଭୟ ବାଇକରେ ଥିବା ତିନି ଜଣ ରାସ୍ତା ଉପରେ ଛିଟିକି ପଡି ଗୁରୁତର ଆହତ ହୋଇଥିଲେ । ସତ୍ୟ ବାଘଙ୍କୁ ବାଇକ ଯୋଗେ ତାଙ୍କର ଜଣେ ସମ୍ପର୍କୀୟ ଡାକ୍ତରଖାନା ଆଣିଥିଲେ ଓ ଅନ୍ୟ ଦୁଇ ଜଣଙ୍କୁ ବାଉଁଶୁଣି ଦମକଳ ବାହିନୀ ଉଦ୍ଧାର କରି ବାଉଁଶୁଣିରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିବା ଜଣାପଡିଛି ।