ବାଲିଗୁଡ଼ା,୧୩/୫- କନ୍ଧମାଳ ଜିଲ୍ଲା ତୁମୁଡ଼ିବନ୍ଧରେ ବଡ଼ ଧରଣର ଡକାୟତି । ମଦ ଦୋକାନରୁ ୬ଲକ୍ଷ ଟଙ୍କାର ମଦ ଲୁଟ୍ ହୋଇଥିବା ଅଭିଯୋଗ ହୋଇଛି । ଏଥିସହିତ ମଦ ଦୋକାନରେ ଥିବା ଇନଭର୍ଟର, ୟୁପିଆଇ ମେସିନ୍ ସହ ସେଲ୍ସ ମ୍ୟାନଙ୍କ ସ୍କୁଟି ଓ ସିସି କ୍ୟାମେରାର ହାର୍ଡ ଡିସ୍କ ମଧ୍ୟ ଦୁବୃର୍ତ୍ତମାନେ ନେଇ ପଳେଇଯାଇଥିବା ଅଭିଯୋଗ କରିଛନ୍ତି ମାଲିକ । ସୂଚନା ପ୍ରକାରେ ଗତ ୧୦ତାରିଖ ରାତି ପ୍ରାୟ ୧୦.୩୦ସମୟରେ ସେଲ୍ସ ମ୍ୟାନ୍ ଦୋକାନ ଭିତରେ ଥିବାବେଳେ ତାଙ୍କର ଅନ୍ୟଜଣେ ସହଯୋଗୀ ସେଠାକୁ ଶୋଇବାକୁ ଆସିଥିଲେ । ସେହି ସମୟରେ ହଠାତ୍ ୮ଜଣ ଦୁବୃର୍ତ୍ତ ଦୋକାନ ଭିତରକୁ ପଶିଆସି ସେଲ୍ସ ମ୍ୟାନ୍ ଓ ତାଙ୍କ ସହଯୋଗୀଙ୍କୁ ଖଟରେ ବାନ୍ଧି ପାଖାପାଖି ୬ଲକ୍ଷ ଟଙ୍କାର ମଦ ଲୁଟ୍ କରିଥିବା ଅଭିଯୋଗ ହୋଇଛି । ଏନେଇ ତୁମୁଡ଼ିବନ୍ଧ ଥାନାରେ ଲିଖିତ ଅଭିଯୋଗ ପରେ ଘଟଣାସ୍ଥଳରେ ପୋଲିସ ପହଁଚି ତନାଘନା ଆରମ୍ଭ କରିଥିବା ଜଣାପଡ଼ିଛି । ହେଲେ ବର୍ତ୍ତମାନ ସୁଦ୍ଧା ପୋଲିସ୍ ହାତରେ ଘଟଣାର କୌଣସି ସୁରାକ୍ ଲାଗିନଥିଲେ ମଧ୍ୟ ପାରିପାର୍ଶ୍ୱିକ ପରିସ୍ଥିତିକୁ ଅନୁଧ୍ୟାନ କରି ତୁମୁଡ଼ିବନ୍ଧ ପୋଲିସ୍ ତଦନ୍ତ ଜାରି ରଖିଥିବା ଜଣାପଡ଼ିଛି ।