ଭୁବନେଶ୍ୱର: ଭଦ୍ରକ ଧାମନଗର ଉପନିର୍ବାଚନ ପାଇଁ ପାର୍ଥୀ ଘୋଷଣା କଲା ବିଜୁ ଜନତା ଦଳ । ଅବନ୍ତୀ ଦାସଙ୍କୁ ବିଜେଡି ପ୍ରାର୍ଥୀ କରିଥିବା ସୂଚନା ମିଳିଛି । ଅବନ୍ତୀଙ୍କ ପାର୍ଥୀତ୍ୱକୁ ବିଜେଡି ସୁପ୍ରିମୋ ନବୀନ୍ ପଟ୍ଟନାୟକ ମୋହର ମାରିଛନ୍ତି । ଅବନ୍ତୀ ବର୍ତ୍ତମାନ ତିହିଡ଼ି ବ୍ଲକ୍ର ଚେୟାରମ୍ୟାନ୍ ଅଛନ୍ତି । ସେହିପରି ଆଜି ବାବା ହରେକୃଷ୍ଣ ସେଠୀଙ୍କୁ କଂଗ୍ରେସର ପ୍ରାର୍ଥୀ ଘୋଷଣା କରିଛି । ବିଜେପି ସ୍ବର୍ଗତ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୂରଜଙ୍କୁ ପ୍ରାର୍ଥୀ କରିଛି । ସୂର୍ଯ୍ୟବଂଶୀ ସୂରଜ ନିଜର ନାମାଙ୍କନ ପତ୍ର ଦାଖଲ କରିସାରିଥିଲା ବେଳେ ପ୍ରଚାର ଆରମ୍ଭ କରିଦେଇଛନ୍ତି। ଉଭୟ ବିଜେପି ଓ କଂଗ୍ରେସ ପୁରୁଷ ପ୍ରାର୍ଥୀ ଦେଇଥିବା ବେଳେ ବିଜେଡି ଏଠାରେ ମହିଳା ପ୍ରାର୍ଥୀ ଛିଡ଼ା କରାଇଛି। ପୂର୍ବରୁ ଏଠାରେ ବିଜେପିର ପ୍ରାର୍ଥୀ ଥିବା ବିଷ୍ଣୁ ସେଠୀ ନିର୍ବାଚନ ଜିତିଥିଲା ବେଳେ ଏଥର ଜଣେ ମହିଳା ପ୍ରାର୍ଥୀଙ୍କୁ ଚୟନ କରିଛି ବିଜେଡି। ଅବନ୍ତୀଙ୍କ ସପକ୍ଷରେ ମତଦାତା ନିଜର ରାୟ ରଖିପାରନ୍ତି ବୋଲି ଦଳ ପକ୍ଷରୁ ଆଶା କରାଯାଉଛି। ତେବେ ଉପନିର୍ବାଚନରେ ମତଦାତା କାହାକୁ ବାଛିବେ ତାହା ନଭେମ୍ବର ୩ରେ ସ୍ଥିରୀକୃତ ହୋଇଯିବ।