ବାଲିଗୁଡ଼ା ୨୦।୧୧ : କନ୍ଧମାଳ ଜିଲ୍ଲା କ.ନୁଆଗାଁରେ ବିଜେଡ଼ି କଂଗ୍ରେସ ମୁହାଁମୁହିଁ ହୋଇଛନ୍ତି । ସୂଚନା ପ୍ରକାରେ ଆଜି କଂଗ୍ରେସ ପକ୍ଷରୁ କ.ନୁଆଗାଁ ବ୍ଲକରେ ମମିତା ମେହେର ହତ୍ୟାକାଣ୍ଡରେ ମମିତାଙ୍କୁ ନ୍ୟାୟ ପ୍ରଦାନ, ଆବାସ ଯୋଜନାରେ ଦୁର୍ନୀତି ଆଦି ପ୍ରସଙ୍ଗକୁ ନେଇ ରାଲି କରୁଥିଲେ କଂଗ୍ରେସ ନେତା ଓ କର୍ମୀ । ସେପଟେ କ.ନୁଆଗାଁ ଡାକ ବଙ୍ଗଳାରେ ବାଲିଗୁଡ଼ା ବିଧାୟକ ଚକ୍ରମଣି କହଁର ସ୍ଥାନୀୟ ନେତା ଓ କର୍ମୀଙ୍କୁ ନେଇ ବିଜୁ ସ୍ବାସ୍ଥ୍ୟ ବିମା ଯୋଜନା ଓ ମୁଖ୍ୟମନ୍ତ୍ରୀଙ୍କ କନ୍ଧମାଳ ଗସ୍ତକୁ ନେଇ ବୈଠକ କରୁଥିବା ସମୟରେ ଡାକ ବଙ୍ଗଳା ନିକଟରେ କଂଗ୍ରେସ ନେତା ଓ କର୍ମୀ ପହଁଚି ବୈଠକ ଭଣ୍ଡୁର କରିବା ଉଦ୍ଦେଶ୍ୟରେ ନାରାବାଜି କରି ହୋ ହାଲ୍ଲା କରିଥିଲେ । ଫଳରେ ଉଭୟ ଗୋଷ୍ଠୀଙ୍କ ମଧ୍ୟରେ ବଚସା ହୋଇଥିଲା । ଘଟଣାସ୍ଥଳରେ କ.ନୂଆଗାଁ ପୋଲିସ୍ ପହଁଚି ଉଭୟ ପକ୍ଷଙ୍କୁ ବୁଝାସୁଝା କରିଥିବା ଜଣାପଡ଼ିଛି । ଅନ୍ୟପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ମୁଳକ ଯୋଜନା କଂଗ୍ରେସ ସହଜରେ ହଜମ କରିପାରୁନି । ଯାହାଫଳରେ ଔଷଧ ବିକଳରେ ତାଟିଆ କାମୁଡ଼ୁଛି ବୋଲି ମୁଖ୍ୟମନ୍ତ୍ରୀଙ୍କ ପ୍ରଶଂସକ ମାନେ ଆଲୋଚନା କରୁଥିବା ଜଣାପଡ଼ିଛି ।