ବୌଦ୍ଧ,୩୦/୮ – ଗତକାଲି ଦୁଇଟି ପୃଥକ ସଡକ ଦୁର୍ଘଟଣାରେ ୨ଜଣ ବାଇକ ଆରୋହୀ ଗୁରୁତର ଆହତ ହୋଇଥିବା ଜଣାପଡିଛି । ଜାତୀୟ ରାଜପଥ ନଂ ୫୭ର ଚାରିଛକସ୍ଥିତ ବିଦ୍ୟୁତ ବିଭାଗ ଅଫିସ ନିକଟରେ ଭାରସାମ୍ୟ ହରାଇ ବାଇକ ଦୁର୍ଘଟଣା ହେବାରୁ ବାଇକ ଆରୋହୀ ରତନପୁର ଗ୍ରାମର ସାନୁ ଅଦାବର (୩୫) ଗୁରୁତର ଆହତ ହୋଇଥିଲେ । ହରଭଙ୍ଗା ଦମକଳ ବାହିନୀ ତାଙ୍କୁ ଉଦ୍ଧାରକରି ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲା । ସେ ବାଇକ ନଂ ଓଡି୨୭ବି୬୬୦୨ ଯୋଗେ ପୁରୁଣାକଟକରୁ ଚାରିଛକ ଯିବାବେଳେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲେ । ସେହିପରି ଅନ୍ୟଏକ ବାଇକ ଦୁର୍ଘଟଣା ଚାରିଛକ-ଛତ୍ରଙ୍ଗ ରାସ୍ତାର ବାଇଶପଡା ନିକଟରେ ହୋଇଥିବା ଜଣାପଡିଛି । ନୟାଗଡ ଅଞ୍ଚଳର ବ୍ରଜବନ୍ଧୁ ଜଗଦଲା ନାମକ ଜଣେ ବ୍ୟକ୍ତି ନୟାଗଡରୁ ଛତ୍ରଙ୍ଗ ଅଭିମୁଖେ ବାଇକ ଓଡି୨୫ ୫୩୬୨ ଯୋଗେ ଆସୁଥିବାବେଳେ ବାଇଶପଡା ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲେ । ତାଙ୍କୁ ମଧ୍ୟ ପୁରୁଣାକଟକ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।