ବୌଦ୍ଧ,୩/୨:- ଉତ୍ତରପ୍ର୍ରଦେଶ ବରେଲିଠାରେ ଅନୁଷ୍ଠିତ ୧୨ତମ ଜାତୀୟ ତାଇକୋଣ୍ଡୁ ପୁମସି ପ୍ରତିଯୋଗିତାରେ ବୌଦ୍ଧ ତାଇକୋଣ୍ଡୁ ଆସୋସିଏସନ ପକ୍ଷରୁ ତିନିଜଣ ଛାତ୍ରୀ ଓ ଜଣେ ଛାତ୍ର ଯୋଗଦାନ କରିଥିଲେ । ସେମାନଙ୍କ ମଧ୍ୟରୁ ସୁଲଗ୍ନା ମିଶ୍ର, ମନୀଷା ସାହୁ, ସୁନୟନା ମେହେର ସ୍ୱର୍ଣ୍ଣ ପଦକ ହାସଲ କରିଛନ୍ତି । ବୌଦ୍ଧରେ ପହଞ୍ଚିବା ପରେ ଜିଲ୍ଲାପାଳ ସତ୍ୟରଞ୍ଜନ ସାହୁ ଏକ ସମ୍ବର୍ଦ୍ଧନା ଉତ୍ସବରେ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧିତ କରିଥିଲେ । ଏହି କାର୍ଯ୍ୟକ୍ରମକୁ ଦେବାଶିଷ ପୁରୋହିତ ସଂଯୋଜନା କରି ବୌଦ୍ଧରେ ତାଇକୋଣ୍ଡୁ ଖେଳରେ ରହିଥିବା ସମସ୍ୟା ସମ୍ପର୍କରେ ଆଲୋଚନା କରିଥିଲେ । କୋଚ ଅଞ୍ଜିତ କୁମାର ସାହୁ ଖେଳର ଉପକାରିତା ଏବଂ ଭବିଷ୍ୟତରେ ସରକାରୀ ଓ ବେସରକାରୀ କର୍ମନିଯୁକ୍ତିରେ ରହିଥିବା ସୁବିଧା ସମ୍ପର୍କରେ ଅବଗତ କରାଇଥିଲେ । ଛାତ୍ରଛାତ୍ରୀମାନେ ସମ୍ମିଳନୀ କକ୍ଷ ଠାରେ କ୍ରୀଡା ପ୍ରଦର୍ଶନ କରିଥିଲେ । ଜିଲ୍ଲାପାଳ ସ୍ୱର୍ଣ୍ଣପଦକ ବିଜେତାଙ୍କୁ ପୁଷ୍ପଗୁଚ୍ଛ ଓ ମାନପତ୍ର ପ୍ରଦାନ କରିଥିଲେ । ବ୍ଲକ ସ୍ତରରେ ଏବଂ ଜବାହର ନବୋଦୟ ବିଦ୍ୟାଳୟରେ ତାଇକୋଣ୍ଡୁ ଖେଳକୁ ଅଭ୍ୟାସ ଆରମ୍ଭ କରିବାପାଇଁ ପରାମର୍ଶ ଦେଇଥିଲେ । ଖେଳ ପାଇଁ ଆବଶ୍ୟକ ଥିବା ସମସ୍ତ ଭିତ୍ତିଭୂମି ଯୋଗାଇ ଦିଆଯିବ ବୋଲି ଜିଲ୍ଲାପାଳ ଶ୍ରୀ ସାହୁ ପ୍ରକାଶ କରିଥିଲେ । ଏହି କାର୍ଯ୍ୟକ୍ରମରେ ସମସ୍ତ ଖେଳାଳୀ, ଅଭିଭାବକ, ସଭାପତି ଯଙ୍ଗେଶ୍ୱର ମିଶ୍ର ଉପସ୍ଥିତ ଥିଲେ ।