ବୌଦ୍ଧ,୨୫/୧୧ – ଗତକାଲି ସନ୍ଧ୍ୟାରେ ଚାରିଛକ – ଫୁଲବାଣୀ ରାସ୍ତାର ରାଣୀପଥର ଘାଟୀ ନିକଟରେ ଏକ ଅଜଣା କାର୍ ଗୋଟିଏ ବାଇକକୁ ଧକ୍କାଦେବା ଫଳରେ ଜଣେ ବୃଦ୍ଧାଙ୍କ ମୃତ୍ୟୁ ହୋଇଥିବାବେଳେ ବୃଦ୍ଧାଙ୍କ ପୁଅ ଓ ନାତି ଗୁରୁତର ଆହତ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଗତକାଲି ସନ୍ଧ୍ୟାରେ ପୁରୁଣାକଟକ ଥାନା ଲୁଣିବାହାଲ୍ ଗ୍ରାମ ପଞ୍ଚାୟତ ଶୁକପାଲି ଗ୍ରାମର ଧର୍ମୁଧର ସେଠୀ (୪୦) କୌଣସି କାମରେ କନ୍ଧମାଳ ଜିଲ୍ଲା ଫିରିଙ୍ଗିଆକୁ ଯାଇ ନିଜ ମା ଭାରତୀ (୬୦ ) ଓ ଭଣଜା ହୃଷିକେଶ (୮) ସହ ବାଇକ ଯୋଗେ ଶୁକପାଲି ଫେରୁଥିଲେ । ସନ୍ଧ୍ୟା ୬ ଘଣ୍ଟା ସମୟରେ ଚାରିଛକ ଠାରୁ ଫୁଲବାଣୀ ଯାଉଥିବା ଏକ କାର୍ ତାଙ୍କ ବାଇକକୁ ବୌଦ୍ଧଜିଲ୍ଲା ସୀମାନ୍ତ ରାଣୀପଥର ଘାଟୀ ନିକଟରେ ଧକ୍କା ଦେଇ ଦ୍ରୁତଗତିରେ ଚାଲିଯାଇଥିଲା । ବାଇକ ସହ ଛିଟିକି ପଡି ତିନିଜଣ ରାସ୍ତା ଉପରେ ଗୁରୁତର ଅବସ୍ଥାରେ ପଡିଥିବା ବେଳେ ରାସ୍ତାରେ ଯା ଆସ କରୁଥିବା ଯାତ୍ରୀମାନେ ହରଭଙ୍ଗା (ଚାରିଛକ) ଦମକଳ ବାହିନୀକୁ ଖବର୍ ଦେଇଥିଲେ । ଖବର ପାଇ ଦମକଳ ବାହିନୀ ଦୁର୍ଘଟଣା ସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରି ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲା । ସେଠାରେ ଡାକ୍ତର ଭାରତୀ ସେଠୀଙ୍କୁ ମୃତ ଘୋଷଣା କରିଥିଲେ । ଆଜି ବୌଦ୍ଧ ଡାକ୍ତରଖାନାରେ ମୃତ ଭାରତୀଙ୍କ ଶବକୁ ବ୍ୟବଚ୍ଛେଦ କରାଯିବାପରେ ପରିବାରବର୍ଗଙ୍କୁ ହସ୍ତାନ୍ତର କରାଯିବ ବୋଲି ପୁରୁଣାକଟକ ଥାନା ପୋଲିସ ସୂତ୍ରରୁ ଜଣାପଡିଛି ।