ବୌଦ୍ଧ,୭/୪:- ଆଜି ରାଜ୍ୟରେ ପୌର ଉପାଧ୍ୟକ୍ଷ ନିର୍ବାଚନ ଅନୁଷ୍ଠିତ ହୋଇଥିବାବେଳେ ବୌଦ୍ଧଗଡ ଏନଏସିରେ ମଧ୍ୟ ଉପାଧ୍ୟକ୍ଷ ନିର୍ବାଚିତ ହୋଇଛନ୍ତି । ବୌଦ୍ଧଗଡ ଏନଏସ କାର୍ଯ୍ୟାଳୟ ପରିସରରେ ଏହି ନିର୍ବାଚନ ଅନୁଷ୍ଠିତ ହୋଇଥିବାବେଳେ ଜଣେ ମାତ୍ର କାଉନସିଲର ଏହି ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଥିଲେ । ବୌଦ୍ଧଗଡ ଏନଏସିରେ ୧୭ ଜଣ କାଉନସିଲରଙ୍କ ମଧ୍ୟରୁ ୧୫ଜଣ ବିଜେଡି ହୋଇଥିବାବେଳେ ୨ଜଣ ବିଜେପି କାଉନସିଲର ରହିଥିଲେ । ନିର୍ଦ୍ଧାରିତ ସମୟ ମଧ୍ୟରେ କେବଳ ରାଜନପାଲିର ୧୧ନଂ ୱାର୍ଡ ବିଜେଡି କାଉନସିଲର ଶୁଭାସିନୀ ସେଠୀ ନାମାଙ୍କନ ପତ୍ର ଦାଖଲ କରିଥିଲେ । ଦିନ ଗୋଟାଏ ସମୟରେ ନିର୍ବାଚନ ଅଧିକାରୀ ଅବିନାଶ ପାଣ୍ଡିଆ ଶୁଭାସିନୀଙ୍କ ନାମ ଉପାଧ୍ୟକ୍ଷା ଭାବେ ନିର୍ଦ୍ଦନ୍ଦ୍ୱରେ ନିର୍ବାଚିତ ହୋଇଥିବା ଘୋଷଣା କରିଥିଲେ । ଏହି ନିର୍ବାଚନ ସମୟରେ ନୂତନ ଚେୟାରମ୍ୟାନ ମୃତ୍ୟୁଞ୍ଜୟ ମିଶ୍ରଙ୍କ ସମେତ ସମସ୍ତ କାଉନସିଲର ଉପସ୍ଥିତ ଥିଲେ ।