ବୌଦ୍ଧ,୧୧/୭ – ବୌଦ୍ଧଜିଲ୍ଲା ହରଭଙ୍ଗା ବ୍ଲକ୍ ହରେକୃଷ୍ଣପୁର ଗ୍ରାମରେ ଥିବା ଆଦିବାସୀ ଉନ୍ନୟନ ବିଭାଗର ଗୋପବନ୍ଧୁ ସରକାରୀ ଉଚ୍ଚ ବିଦ୍ୟାଳୟର ଏକ ଅସମ୍ପୂର୍ଣ୍ଣ ଶ୍ରେଣୀ ଗୃହ ଗୋରୁ ଗୁହାଳରେ ବ୍ୟବହାର ହେଉଥିବା ଦେଖିବାକୁ ମିଳୁଛି । ବହୁ ବର୍ଷ ତଳେ ହରଭଙ୍ଗା ପଂଚାୟତ ସମିତି ତରଫରୁ ନୂତନ ଶ୍ରେଣୀ ଗୃହ ନିର୍ମାଣ କାମ ଆରମ୍ଭ ହୋଇଥିଲା । ଠିକାଦାର କିଛି କାମ ନକରି ତାର ବିଲ୍ ନେଇ ଚାଲିଯିବା ଫଳରେ ବହୁ ବର୍ଷ ଧରି ଅର୍ଦ୍ଧନିର୍ମିତ ହୋଇ ପଡିଛି । ବିଦ୍ୟାଳୟର ପାଖରେ ଥିବା ଗ୍ରାମବାସୀ ବର୍ତ୍ତମାନ ଏ ଘରକୁ ଗୋରୁ ଗୁହାଳ ଭାବରେ ବ୍ୟବହାର କରୁଥିବା ଦେଖିବାକୁ ମିଳୁଛି । ଜିଲ୍ଲା କଲ୍ୟାଣ ବିଭାଗ ଅଧିକାରୀ କିମ୍ବା ବ୍ଲକ୍ ପ୍ରଶାସନ ଅସମ୍ପୂର୍ଣ୍ଣ ଶ୍ରେଣୀ ଗୃହ ନିର୍ମାଣ ପାଇଁ ତୁରନ୍ତ ପଦକ୍ଷେପ ନେବାକୁ ଜନସାଧାରଣରେ ଦାବୀ ହେଉଛି ।