ବୌଦ୍ଧ,୨୫ା୬ :ମାଉସୀମା’ ମନ୍ଦିରଠାରେ ଚତୁର୍ଦ୍ଧାମୂର୍ତ୍ତିଙ୍କ ଅବସ୍ଥାନ ସମୟରେ ଅବତାରୀ ବେଶରେ ଭକ୍ତମାନଙ୍କୁ ଦର୍ଶନ ଦେବା ସହିତ ଜିଲ୍ଲା ପ୍ରଶାସନ ପକ୍ଷରୁ ପ୍ରତିଦିନ ଭଜନ ଅନୁଷ୍ଠିତ ହେଉଛି । ଆଜି ମହାପ୍ରଭୁଙ୍କ ୫ମ ଦିନର ଅବସ୍ଥାନରେ ଚତୁର୍ଦ୍ଧାମୂର୍ତ୍ତି ଶ୍ରୀରାମ ବଳରାମ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି । ଏହି ଅବସରରେ ସଙ୍ଗିତାୟନ, ସୃଷ୍ଟି ଡ୍ୟାନସ ଏକାଡେମୀ, ଗେହ୍ଲାମା କଳାନିକେତନ, ସନ୍ତୋଷ ଦାଶ ଓ ସାଥୀଙ୍କ ଦ୍ୱାରା ଭଜନ ସନ୍ଧ୍ୟା ପରିବେଷଣ ହୋଇଥିଲା । ପଞ୍ଚମ ଦିବସରେ ସୀତାରାମ କଳା ଅନୁଷ୍ଠାନ ପକ୍ଷରୁ ଭଜନ ପରିବେଷଣ କରାଯାଇଥିବାବେଳେ ଆଗକୁ ରାମଲୀଳା ନାଟ୍ୟସଂସଦ ଓ ନାଗରିକ କମିଟି ପକ୍ଷରୁ ମଧ୍ୟ ଭଜନ ସନ୍ଧ୍ୟା ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । ଭଜନ ସନ୍ଧ୍ୟା କାର୍ଯ୍ୟକ୍ରମକୁ ଚନ୍ଦ୍ରକାନ୍ତ ନାଏକ, ଅଧ୍ୟାପକ ପ୍ରତାପ କୁମାର ରଥ ପ୍ରମୁଖ ସଂଯୋଜନା କରୁଛନ୍ତି । ତେବେ ଚତୁର୍ଥ ଦିବସରେ ଅତିରିକ୍ତ ଜିଲ୍ଲାପାଳ ଦାରିଦ୍ର୍ୟଭଞ୍ଜନ ମଦନ ମୋହନ ପାତ୍ରଙ୍କ ଦ୍ୱାରା ପରିବେଷିତ ଭଜନ ଉପସ୍ଥିତ ଶ୍ରଦ୍ଧାଳୁମାନଙ୍କ ଦ୍ୱାରା ଉଚ୍ଚ଼ ପ୍ରଶଂସିତ ହୋଇଥିଲା । ଏନଏସି ପକ୍ଷରୁ ଗୁଣ୍ଡିଚା ମନ୍ଦିରରେ ଶ୍ରଦ୍ଧାଳୁମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯିବାପରେ ବର୍ଷା ସତ୍ତେ୍ୱ ମଧ୍ୟ ବହୁ ସଂଖ୍ୟାରେ ଶ୍ରଦ୍ଧାଳୁ ଭଜନ ସନ୍ଧ୍ୟା ଉପଭୋଗ କରୁଥିବା ଦେଖିବାକୁ ମିଳିଛି ।