ବୌଦ୍ଧ,୨୧/୪ – ଆଜି ଅପରାହ୍ନ ପ୍ରାୟ ୨ ଘଣ୍ଟା ସମୟରେ ବୌଦ୍ଧବ୍ଲକ୍ ପଦ୍ମନପୁର୍ ଗ୍ରାମ ପଞ୍ଚାୟତ ଅନ୍ତର୍ଗତ ଦାମୋଦରପୁର୍ ଦଳିତ ସାହିରେ ଆକସ୍ମିକ ଅଗ୍ନିକାଣ୍ଡ ଘଟି ଦୁଇଟି ପରିବାରର ୩ ବଖରା ଘର ଭସ୍ମୀଭୂତ ହୋଇ ଯାଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଆଜି ଅପରାହ୍ନ ପ୍ରାୟ ୨ ଘଣ୍ଟା ସମୟରେ ଦାମୋଦରପୁର ଗ୍ରାମର ଦଳିତସାହିରେ ଉପରେ ଯାଇଥିବା ବିଦ୍ୟୁତ ତାର ପବନରେ ଘସିହୋଇ ରଙ୍ଗୀ ସିଂ ଓ ହେମନ୍ତ ସିଂ ଙ୍କ ଘର ଉପରେ ନିଆଁ ପଡିଥିଲା । ଫଳରେ ରଙ୍ଗୀ ସିଂଙ୍କ ୧ ବଖରା ଓ ହେମନ୍ତଙ୍କ ୨ ବଖରା ଘର ପୋଡିଯାଇଥିଲା । ପ୍ରବଳ ଖରା ଓ ତତଲା ପବନ ଯୋଗୁଁ କୌଣସି ଜିନିଷ ଉଦ୍ଧାର କରିବା ସମ୍ଭବ ହୋଇ ପାରିଲା ନାହିଁ । ଘରର ମୂଲ୍ୟବାନ୍ କାଗଜପତ୍ର, ଲୁଗାପଟା, ନଗଦ ଟଂକା, ଖାଦ୍ୟଶସ୍ୟ ଓ ସମସ୍ତ ଆସବାବପତ୍ର ପୋଡି ପାଉଁଶ ହୋଇ ଯାଇଥିବା ଜଣାପଡିଛି । ଖବରପାଇ ବୌଦ୍ଧ ଦମକଳ ବାହିନୀ ପହଞ୍ଚିବା ବେଳକୁ ସବୁ ଭସ୍ମୀଭୂତ ହୋଇ ସାରିଥିଲା । ଉଭୟ ପରିବାର ଅତି ଗରିବଶ୍ରେଣୀର ହୋଇଥିବାରୁ ତାଙ୍କୁ ସରକାରୀ ସହାୟତା ଯୋଗାଇ ଦେବାସହ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ଯୋଗାଇ ଦେବାକୁ ଗ୍ରାମବାସୀ ଦାବୀ କରିଛନ୍ତି ।