ବୌଦ୍ଧ,୨୧/୧୦- ଆଜି ବୌଦ୍ଧଜିଲ୍ଲା ପୁଲିସ ଆନୁକୂଲ୍ୟରେ ବଲାସିଙ୍ଗାସ୍ଥିତ ଆଇଆରବି ପ୍ୟାରେଡ ପଡିଆରେ ୬୧ତମ ସହିଦ ଦିବସ ପାଳିତ ହୋଇଯାଇଛି । ଏଥିରେ ମୁଖ୍ୟଅତିଥି ଭାବେ ବୌଦ୍ଧଜିଲ୍ଲା ଆରକ୍ଷୀ ଅଧୀକ୍ଷକ ଭି. ରଘୁନାଥ ରାଓ ଯୋଗଦେଇ ପ୍ୟାରେଡରେ ଅଭିବାଦନ ଗ୍ରହଣ କରିଥିଲେ । ବିଭିନ୍ନ ସମୟରେ ସହିଦ ହୋଇଥିବା ଯବାନମାନଙ୍କୁ ସ୍ମରଣକରିବା ସହିତ ସେମାନଙ୍କ ନାମ ଓ ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଆରକ୍ଷୀ ଅଧୀକ୍ଷକ ଶ୍ରୀ ରାଓ ପଠନ କରିଥିଲେ । ଏହି ଅବସରରେ ସହିଦସ୍ତମ୍ଭରେ ପୁଷ୍ପଗୁଚ୍ଛ ପ୍ରଦାନ ପୂର୍ବକ ସହିଦମାନଙ୍କୁ ସ୍ମରଣ କରାଯାଇଥିଲା । ଅତିଥିଭାବେ ଆଇଆରବି କମାଣ୍ଡାଣ୍ଟ ବିଜୟ ପ୍ରକାଶ ବାବୁ, ଡେପୁଟି କମାଣ୍ଡାଣ୍ଟ ଲକ୍ଷ୍ମୀଧର ମହାରଣା ଓ ଲଳିତ କୁମାର ବାଗ, ଆସିଷ୍ଟାଣ୍ଟ କମାଣ୍ଡାଣ୍ଟ ବେଲାର ମେହେର ଯୋଗଦେଇଥିଲେ । ପ୍ୟାରେଡ ପରିଚାଳନା କରିଥିଲେ ଆରଆଇ ରାଜୀବ ଲୋଚନ ସେଠ୍ । ଏହି କାର୍ଯ୍ୟକ୍ରମରେ ଏସଡିପିଓ ସାଲେଷ୍ଟିନ ଟିଗା, ଆଦର୍ଶ ଥାନା ଅଧିକାରୀ ତପସ୍ୱିନୀ କହଁରଙ୍କ ସମେତ ସମସ୍ତ ପୁଲିସ ଅଧିକାରୀ, କର୍ମଚାରୀ ଯୋଗଦେଇଥିଲେ । କୋଭିଡ ନିୟମ ଅନୁଯାୟୀ ସମସ୍ତେ ମାସ୍କ ପରିଧାନ ଓ ସାମାଜିକ ଦୂରତା ରକ୍ଷାକରି ଏହି ଦିବସ ପାଳନ କରିଥିଲେ ।