ବୌଦ୍ଧ,୧୦/୪- ବୌଦ୍ଧବ୍ଲକ ତେଲିବନ୍ଧ ଗ୍ରାମପଞ୍ଚାୟତ ଅନ୍ତର୍ଗତ କମଳପୁର ପ୍ରାଥମିକ ବିଦ୍ୟାଳୟରେ ବିଦ୍ୟାଳୟ ପରିଚାଳନା କମିଟିର ଏକ ବୈଠକ ଅନୁଷ୍ଠିତ ହୋଇଯାଇଛି । ପ୍ରଧାନ ଶିକ୍ଷୟିତ୍ରୀ ବାସନ୍ତୀ ବେହେରା ଅତିଥି ପରିଚୟ ସହିତ ବୈଠକର ଉଦ୍ଦେଶ୍ୟ ଜ୍ଞାପନ କରିଥିଲେ । ଉକ୍ତ ବିଦ୍ୟାଳୟରେ ଶ୍ରେଣୀ କୋଠରୀର ଅଭାବ ରହିଥିବାରୁ ତେଲିବନ୍ଧ ଗ୍ରାମପଞ୍ଚାୟତର ନବ ନିର୍ବାଚିତ ସରପଞ୍ଚ ରତ୍ନାକର ନାୟକ ବୈଠକରେ ଉପସ୍ଥିତ ରହି ଖୁବଶୀଘ୍ର ଶ୍ରେଣୀକୋଠରୀ ନିର୍ମାଣ କରିବାକୁ ପ୍ରତିଶୃତି ଦେଇଥିଲେ । ମଧ୍ୟାହ୍ନ ଭୋଜନ ପାଚିକା ସାବିତ୍ରୀ ଦନାୟକ ବୟସ ହେତୁ ଅବସର ନେଇଥିବାରୁ ପାଚିକା ନିଯୁକ୍ତିର ସରକାରୀ ନିୟମ ସମ୍ପର୍କରେ ସି ଆର ସି ସି ରାଜକୁମାର ପ୍ରଧାନ ଆଲୋଚନା କରିଥିଲେ । ଖାଲି ହୋଇଥିବା ପାଚିକା ପଦବୀ ପାଇଁ ଆବେଦନ କରିଥିବା ଚାରି ଜଣ ମହିଳାଙ୍କ ମଧ୍ୟରୁ ନିରାଶ୍ରୟ ମହିଳା ଅତୁଲ ଭୋଇଙ୍କୁ ନିୟମ ଆଧାରରେ ସର୍ବସମ୍ମତି କ୍ରମେ ମନୋନୀତ କରାଯାଇଥିଲା । ଉକ୍ତ ପ୍ରସ୍ତାବକୁ ଅନୁମୋଦନ ସକାଶେ ଗୋଷ୍ଠୀ ଶିକ୍ଷା ଅଧିକାରୀ ବୌଦ୍ଧଙ୍କ ନିକଟକୁ ପଠାଇବାକୁ ପ୍ରଧାନ ଶିକ୍ଷୟିତ୍ରୀଙ୍କୁ ଦାୟିତ୍ୱ ଦିଆଯାଇଥିଲା । ଏହା ପରେ ପ୍ରଥମଶ୍ରେଣୀ ପିଲାଙ୍କ ନାମଲେଖା ସମ୍ପର୍କରେ ଆଲୋଚନା କରାଯାଇଥିଲା । ଶିକ୍ଷୟିତ୍ରୀ ମୋନାଲିସା ଆଚାର୍ଯ୍ୟ ଧନ୍ୟବାଦ ଦେଇଥିଲେ ।