ବୌଦ୍ଧ,୧୭/୪ – ଆଜି ଠାରୁ ବୌଦ୍ଧ ସହରରେ ରାତ୍ରୀକାଳୀନ କର୍ଫ୍ୟୁ ଲାଗୁ ହେବ । ରାତି ୯ ଘଣ୍ଟା ସମୟ ଠାରୁ ସକାଳ ୫ ଘଣ୍ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ । ସେଥିପାଇଁ ପ୍ରଶାସନ ପକ୍ଷରୁ ଆଜି ଲୋକଙ୍କୁ ବ୍ୟାପକ ସଚେତନ କରାଯାଇଛି । ଅତିରିକ୍ତ ତହସିଲଦାର ତ୍ରିଦେବ୍ ରଥଙ୍କ ସମେତ ବୌଦ୍ଧ ଏନଏସିର ନିର୍ବାହୀ ଅଧିକାରୀ ଇଂ. ମନୋରଂଜନ ପଣ୍ଡା, ବୌଦ୍ଧ ଆଦର୍ଶ ଥାନା ଅଧିକାରୀ ତପସ୍ୱିନୀ କହଁର ସହରର ବିଭିନ୍ନ ଅଂଚଳ ବୁଲି ଦୋକାନୀ ଓ ଜନସାଧାରଣଙ୍କୁ କୋଭିଡ ପ୍ରୋଟୋକଲ ଅନୁପାଳନ ପାଇଁ ଅନୁରୋଧ କରିଥିଲେ । ମାସ୍କ ପିନ୍ଧିନଥିବା ଗ୍ରାହକମାନଙ୍କୁ ଜିନିଷ ନଦେବାକୁ ଦୋକାନୀମାନଙ୍କୁ କୁହାଯାଇଥିଲା । ମାସ୍କ ପିନ୍ଧି ନଥିବା ଓ କୋଭିଡ୍ ପ୍ରୋଟୋକଲ୍ ମାନିନଥିବା କିଛି ଅମାନିଆ ମାନଙ୍କ ଠାରୁ ଜୋରିମାନା ମଧ୍ୟ ଆଦାୟ କରାଯାଇଥିବା ଜଣାପଡିଛି । ମାଇକ ଯୋଗେ ଲୋକଙ୍କୁ ସୁଚନା ମଧ୍ୟ ପ୍ରଦାନ କରାଯାଇଥିଲା ।ଆଜିର କାର୍ଯ୍ୟକ୍ରମରେ ପୋଲିସ୍ ଓ ଏନ.ଏ. ସି. ର କର୍ମଚାରୀମାନେ ମଧ୍ୟ ସାମିଲ ହୋଇଥିଲେ ।