ବୌଦ୍ଧ/ବାଉଁଶୁଣୀ,୧୩/୪ – ଗତକାଲି ବିଳମ୍ବିତ ରାତିରେ ଜାତୀୟ ରାଜପଥ ନମ୍ବର ୫୭ର ବୌଦ୍ଧବ୍ଲକ୍ ସାହାଜପାଲ୍ ନିକଟ କନକପୁର ଛକ ନିକଟରେ ସମାନ ଦିଗରୁ ଆଗପଛ ହୋଇ ଆସୁଥିବା ଗୋଟିଏ କାରକୁ ଏକ ବୋଲେରୋ ଧକ୍କା ଦେଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଗତକାଲି ରାତି ପ୍ରାୟ ୨ ଘଂଟା ସମୟରେ ମନମୁଣ୍ଡା ଦିଗରୁ ବୌଦ୍ଧ ଆଡକୁ ଗୋଟିଏ କାର୍ ଓଡି ୦୮ ଏମ ୧୩୮୧ ଆସୁଥିବାବେଳେ ତା ପଛରେ ଆଉ ଗୋଟିଏ ବଲେରୋ ଓଡି ୩୧ ୬୨୭୭ ଆସୁଥିଲା । ଜାତୀୟ ରାଜପଥ ନମ୍ବର ୫୭ର ସାହାଜପାଲ ନିକଟ କନକପୁର ଛକ ନିକଟରେ ଥିବା ହମ୍ପସ୍ ନିକଟରେ କାରଟି ଗତି କମାଇଥିଲା । ପଛରେ ଦ୍ରୁତ ଗତିରେ ଆସୁଥିବା ବୋଲେରୋ କାର୍କୁ ପଛ ପାଖରୁ ଧକ୍କା ଦେଇଥିଲା । ଫଳରେ କାରର ପଛପାଖ କ୍ଷତିଗ୍ରସ୍ତ ହୋଇଥିବା ଜଣାପଡିଛି । ଗାଡିରେ ଥିବା ଯାତ୍ରୀମାନେ ସୁରକ୍ଷିତ ଥିବାବେଳେ ବାଉଁଶୁଣୀଥାନା ପୋଲିସ ଉଭୟ ଗାଡିକୁ ଥାନାକୁ ନେଇ ବୁଝାମଣା କରାଉଥିବା ସୁଚନା ମିଳିଛି ।