ବୌଦ୍ଧ,୧୬/୪ – ଅବକାରୀ ଅଧୀକ୍ଷକ ଶ୍ରୀମତୀ କ୍ରିଷ୍ଣା ନାଏକଙ୍କ ନିର୍ଦ୍ଦେଶକ୍ରମେ ଅବକାରୀ ଉପ ନିରୀକ୍ଷକ ରମେଶ ଚନ୍ଦ୍ର ମହାନ୍ତିଙ୍କ ନେତୃତ୍ୱରେ ଆଜି ଅବକାରୀ ଓ ପୋଲିସର ମିଳିତ ଚଢାଉରେ ବାଉଁଶୁଣୀ ଥାନା ସିଙ୍ଗାରୀ ନିକଟ ଗୋଟିଏ ଢାବାରୁ ବିପୁଳ ପରିମାଣର ବିଅର୍ ଜବତ୍ ହୋଇଥିବା ଜଣାପଡିଛି । ଅବକାରୀ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ଆଜି ସକାଳେ ଅବକାରୀ ଉପ ନିରୀକ୍ଷକ ରମେଶ ଚନ୍ଦ୍ର ମହାନ୍ତିଙ୍କ ନେତୃତ୍ୱରେ ଅବକାରୀ ଓ ପୋଲିସ୍ ସିଙ୍ଗାରୀ ନିକଟରେ ଥିବା ବକ୍ସି ଢାବାରେ ଚଢାଉ କରାଯାଇଥିଲା । ସେଠାରୁ ୭. ୧୯୦ ଲିଟର ବିଦେଶୀ ମଦ ସହ ୨୪୬ ଲିଟର ବିଅର୍ ଜବତ୍ କରାଯାଇଥିଲା । ଢାବାମାଲିକ କୌଶଳ କ୍ରମେ ଫେରାର ହୋଇ ଯାଇଥିବା ବେଳେ ତାଙ୍କର ଜଣେ ସହଯୋଗୀ ପପୁନ୍ ବାଘ (୧୮ ବର୍ଷ )ଙ୍କୁ ଗିରଫ କରାଯାଇଥିବା ଉପ ନିରୀକ୍ଷକ ଶ୍ରୀ ମହାନ୍ତି ସୁଚନା ଦେଇଛନ୍ତି । ସେହିପରି ଆଜି ଭିନ୍ନ ଭିନ୍ନ ଚଢାଉରେ ବାବୁଲା ମହାନନ୍ଦିଆ (୩୫) ଏବଂ ସଚ୍ଚି ବଗର୍ତ୍ତି (୨୭) ଙ୍କ ଠାରୁ ୧୦ ଲିଟର ଲେଖାଏଁ ଦେଶୀ ମଦ ଜବତ୍ କରି ଗିରଫ କରାଯାଇଥିବା ଜଣାପଡିଛି ।