ବୌଦ୍ଧ, ୧୦/୧୧ – ମନମୁଣ୍ଡା ଥାନା ଖଟଖଟିଆ ଗ୍ରାମ ପଂଚାୟତ ସିନ୍ଦୁରପୁର ଗ୍ରାମରେ ଗୋଟିଏ ଅଭାବନୀୟ ଘଟଣା ଘଟିଛି । ପୂର୍ବ ଶତ୍ରୁତାକୁ ନେଇ ଆକାଶ ପାଢୀ (୨୦) ନାମକ ଜଣେ ଯୁବକଙ୍କୁ ଘରେ ପଶି ମାରଣାସ୍ତ୍ରରେ ଆକ୍ରମଣ କରି ବିଷ ପିଆଇ ହତ୍ୟା ଉଦ୍ୟମ କରିଥିବା ମନମୁଣ୍ଡା ଥାନାରେ ଅଭିଯୋଗ ହୋଇଛି । ବିଳମ୍ବରେ ପ୍ରାପ୍ତ ସୂଚନା ଅନୁଯାୟୀ ନଭେମ୍ବର ପହିଲାରେ ପୂର୍ବ ଶତ୍ରୁତାକୁ କେନ୍ଦ୍ରକରି ସିନ୍ଦୁରପୁର୍, ଖଟଖଟିଆ, ପଥର୍ଲା ଓ ଭଇଁସା ଗ୍ରାମର କିଛି ବ୍ୟକ୍ତି ଏକାଠି ହୋଇ ସିନ୍ଦୁରପୁର୍ ଗ୍ରାମର ଆକାଶ ପାଢୀଙ୍କ ଘରକୁ ଯାଇ ମାରଣାସ୍ତ୍ରରେ ଆକ୍ରମଣ କରି ବିଷ ପିଆଇଥିଲେ । ପରେ ତାଙ୍କର ଭିନ୍ନକ୍ଷମ ଭଉଣୀ ଓ ତାଙ୍କୁ ଗୋଟିଏ ବଖରାରେ ଭର୍ତ୍ତି କରି ବାହାରୁ କବାଟ ବନ୍ଦ କରି ଦେଇଥିଲେ । ପରିବାର ଲୋକ ଉଭୟଙ୍କୁ ଉଦ୍ଧାର କରି ଆକାଶକୁ ପ୍ରଥମେ ସୋନପୁର ଓ ପରେ ବୁର୍ଲା ଡାକ୍ତରଖାନାରେ ଭର୍ତ୍ତି କରିଥିଲେ । ବର୍ତ୍ତମାନ ସୁଦ୍ଧା ଅଭିଯୁକ୍ତମାନେ ପୋଲିସ୍ ହାତରେ ଧରାପଡିନଥିବାବେଳେ ଆକାଶଙ୍କ ପରିବାର ଭୟରେ ନିଜ ଘରେ ନରହି ଅନ୍ୟତ୍ର ରହୁଛନ୍ତି । ଏ ସମ୍ପର୍କରେ ଏକ ମାମଲା ମନମୁଣ୍ଡା ଥାନାରେ ରୁଜୁ ହେବା ପରେ ପୋଲିସ୍ ଘଟଣାର ଅନୁସନ୍ଧାନ ଚଳାଇଛି । ପୂର୍ବରୁ ମଧ୍ୟ ଗତ ଜୁନ୍ ମାସରେ ଅଭିଯୁକ୍ତ ଆକାଶ ଓ ତାଙ୍କର ବାପା ନାରଦ ପାଢୀଙ୍କୁ ମରଣାନ୍ତକ ଆକ୍ରମଣ କରିଥିଲେ । ମନମୁଣ୍ଡା ଥାନାରେ ଏ ସମ୍ପର୍କରେ ଅଭିଯୋଗ ହୋଇଥିଲେ ମଧ୍ୟ ପୋଲିସ୍ କୌଣସି କାର୍ଯ୍ୟାନୁଷ୍ଠାନ ନେଇନଥିବା ଯୋଗୁଁ ସେମାନେ ପୁନର୍ବାର ଦ୍ୱିତୀୟଥର ଆକ୍ରମଣ କରିବାକୁ ସାହାସ ପାଇଲେ ବୋଲି ଆକାଶଙ୍କ ପରିବାର ଅଭିଯୋଗ କରିଛନ୍ତି ।