ବୌଦ୍ଧ – ଫ୍ରେଣ୍ଡସିପ କ୍ଲବ ପକ୍ଷରୁ ସ୍ଥାନୀୟ ଇନଡୋର ଷ୍ଟାଡିୟମ ଠାରେ ଅନୁଷ୍ଠିତ ହୋଇଥିବା ଦୁଇଦିନିଆ ଜିଲ୍ଲାସ୍ତରୀୟ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ ଉଦ୍ଯାପିତ ହୋଇଯାଇଛି । ଉଦଯାପନୀ ମ୍ୟାଚରେ ନେହେରୁ ଯୁବ କେନ୍ଦ୍ରର ଜିଲ୍ଲା ସଂଯୋଜକ ବୀରେନ୍ଦ୍ର ସିଂ ଅତିଥି ଭାବରେ ଯୋଗ ଦେଇଥିଲେ । ଏହି ଅବସରରେ ପ୍ରାକ୍ତନ ଜାତୀୟ ବ୍ୟାଡମିଣ୍ଟନ ଖେଳାଳି ପ୍ରଦୋଷ ମହାରଣାଙ୍କୁ କ୍ଲବ୍ ପକ୍ଷରୁ ସମ୍ମାନୀତ କରାଯାଇଥିଲା । ଫାଇନାଲ ମ୍ୟାଚରେ ସାନିଆ ଟିମ ବିଜୟୀ ହୋଇଥିଲା । ଟୁର୍ଣ୍ଣାମେଣ୍ଟ ଆୟୋଜନ ପାଇଁ ଫ୍ରେଣ୍ଡସିପ କ୍ଲବର କର୍ମକର୍ତ୍ତା ଓ ସଦସ୍ୟ ସୁମନ ଷଡ଼ଙ୍ଗୀ, ତୋଫାନ ପରିଡ଼ା, ସୁବ୍ରତ ପୁରୋହିତ, ସମ୍ୟକ୍ ନାୟକ, କଲ୍ୟାଣ ମହାପାତ୍ର ପ୍ରମୁଖ ଭୂମିକା ନିର୍ବାହ କରିଥିଲେ । କରୋନା ଆକ୍ରାନ୍ତ ହୋଇ ପ୍ରାଣ ହରାଇଥିବା ମୁର୍ଷୁଣ୍ଢି ଗ୍ରାମର ଗୋଟିଏ ଗରିବ ଅସହାୟ ପରିବାରକୁ ସହାୟତା ଯୋଗାଇ ଦେବା ପାଇଁ ବୌଦ୍ଧ ଫ୍ରେଣ୍ଡସିପ କ୍ଲବ ପକ୍ଷରୁ ଏହି ଦୁଇଦିନିଆ ବ୍ୟାଡମିଣ୍ଟନ୍ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଥିଲା । ଏହି ମ୍ୟାଚରୁ ସଂଗୃହିତ ଅର୍ଥ ରାଶିକୁ ମୃତକଙ୍କ ଧର୍ମ ପତ୍ନୀ ଜଲିରାଣୀ ବେହେରାଙ୍କୁ ସହାୟତା ହିସାବରେ ପ୍ରଦାନ କରାଯାଇଥିଲା ।