ବୌଦ୍ଧ,୭/୩: ବୌଦ୍ଧ ବିଜ୍ଞାପିତ ଅଞ୍ଚଳ ପରିଷଦ ପାଇଁ ଆଜି ନାମାଙ୍କନ ପତ୍ର ଦାଖଲର ଅନ୍ତିମ ଦିବସ ଥିବାବେଳେ ସମସ୍ତଦଳ ତରଫରୁ ୧୭ଟି ୱାର୍ଡ ପାଇଁ କାଉନସିଲର ଓ ଅଧ୍ୟକ୍ଷ ପଦପାଇଁ ସମସ୍ତ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଛନ୍ତି । ଅଧ୍ୟକ୍ଷ ପଦ ପାଇଁ ବିଜେପି ଦଳ ତରଫରୁ ଯୁଗଳ କିଶୋର ସାମଲ ପ୍ରାର୍ଥୀପତ୍ର ଦାଖଲ କରିଛନ୍ତି । ଶ୍ରୀ ସାମଲ ବିଜେପି ଦଳର ବରିଷ୍ଠ ନେତା, କର୍ମୀ ଓ ସମର୍ଥକଙ୍କ ସହ ରାମେଶ୍ୱର ମନ୍ଦିରରୁ ଶୋଭାଯାତ୍ରାରେ ବାହାରି ସହର ପରିକ୍ରମାକରି ସମସ୍ତ କାଉନସିଲର ପ୍ରାର୍ଥୀଙ୍କ ସହ ଏନଏସି କାର୍ଯ୍ୟାଳୟରେ ପହଞ୍ଚିଥିଲେ । ସେଠାରେ ବିଧିବଦ୍ଧ ଭାବେ ନିର୍ବାଚନ ଅଧିକାରୀ ତଥା ବୌଦ୍ଧ ତହସିଲଦାର ଅବିନାଶ ପାଣ୍ଡିଆଙ୍କ ନିକଟରେ ଶ୍ରୀ ସାମଲ ନାମାଙ୍କନ ପତ୍ର ଦାଖଲ କରିଥିଲେ ।
ସେହିପରି ବିଜେଡ଼ି ଦଳ ତରଫରୁ ଅଧ୍ୟକ୍ଷ ପଦ ପାଇଁ ମୃତ୍ୟୁଞ୍ଜୟ ମିଶ୍ର ତାଙ୍କ ସମସ୍ତ କାଉନସିଲରଙ୍କ ସହ ନେତା ଓ କର୍ମୀଙ୍କ ଗହଣରେ ଶୋଭାଯାତ୍ରାରେ ରଘୁନାଥମନ୍ଦିରରୁ ବାହାରି ଏନ୍ଏସି କାର୍ଯ୍ୟାଳୟରେ ପହଞ୍ଚି ନାମାଙ୍କନ ପତ୍ର ଦାଖଲ କରିଥିଲେ । କଂଗ୍ରେସ ଦଳ ତରଫରୁ ଗଣେଶ ପ୍ରସାଦ ଅଗ୍ରୱାଲ ତାଙ୍କ କାଉନସିଲର ପ୍ରାର୍ଥୀଙ୍କ ସହ ଭୈରବୀ ମନ୍ଦିରରୁ ଶୋଭାଯାତ୍ରାରେ ବାହାରି ନେତା ଓ କର୍ମୀଙ୍କ ସହ ଏନଏସି କାର୍ଯ୍ୟାଳୟରେ ପହଞ୍ଚି ନାମାଙ୍କନ ପତ୍ର ଦାଖଲ କରିଥିଲେ । ସ୍ୱାଧୀନ ପ୍ରାର୍ଥୀ ଭାବେ ଅଧ୍ୟକ୍ଷ ପଦବୀ ପାଇଁ ରାଜକୁମାର ମେହେର, ରେବତୀ ବେହେରା, ସତ୍ୟବାନ ମହାକୁଡ, ରଞ୍ଜିତ କୁମାର ପଟ୍ଟନାୟକ, ଲକ୍ଷ୍ମୀପ୍ରିୟା ପରିଡା ନାମାଙ୍କନ ପତ୍ର ଦାଖଲ କରିଥିବା ଜଣାପଡିଛି ।