ବୌଦ୍ଧ,୨୭/୭ –ବୌଦ୍ଧଜିଲ୍ଲା କଣ୍ଟାମାଳ ବ୍ଲକ୍ ଖଟଖଟିଆ ଗ୍ରାମ ପଂଚାୟତର ଜାଲପାଲି ଗ୍ରାମରେ ବିଦ୍ୟୁତ୍ ବିଭାଗର ଟ୍ରାନ୍ସଫରମର ଓ ଫ୍ୟୁଜ ବକ୍ସ ବିପଦ ସଂକୁଳ ଅବସ୍ଥାରେ ରହିଥିବା ଦେଖିବାକୁ ମିଳୁଛି । ଟ୍ରାନ୍ସଫର୍ମର ତଳେ କମ୍ ଉଚ୍ଚତାରେ ଥିବା ଫ୍ୟୁଜ ବକ୍ସର ଢାଙ୍କୁଣୀ ନ ଥିବାରୁ କେତେବେଳେ କୋଉ ଅଘଟଣ ଘଟିବ ତାହା କହି ହେଉନାହିଁ । ଟ୍ରାନ୍ସଫର୍ମର ଖୋଲାମେଲାରେ ଥିବାରୁ ମଣିଷ ଓ ଗାଈ ଗୋରୁ କେତେବେଳେ ବିଦ୍ୟୁତ୍ ସଂସ୍ପର୍ଶରେ ଆସିଲେ ଧନ ଜୀବନ କ୍ଷୟ କ୍ଷତି ହେବାର ସମ୍ଭାବନା ରହିଛି । ଏ ସମ୍ପର୍କରେ ବିଭାଗୀୟ ଅଧିକାରୀ ମାନଙ୍କୁ ବାରମ୍ବାର ଅଭିଯୋଗ କଲେ ମଧ୍ୟ କୌଣସି ସୁରକ୍ଷିତ ବ୍ୟବସ୍ଥା କରାଯାଉନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଟ୍ରାନ୍ସଫରମର ଚାରି ପାଖରେ ବାଡା ଦେବା ସହ ଫ୍ୟୁଜ ବକ୍ସର ଢାଙ୍କୁଣୀ ତୁରନ୍ତ ଲଗାଯିବାକୁ ଗ୍ରାମବାସୀ ଦାବୀ କରିଛନ୍ତି ।